Euro U21 semifinal khel tur England

England Under 20-in U20 World Cup 2017 no­mawi an chawi hnu lawkah English football-in chanchin lawmawm dang an nei leh ta a, Euro Under 21 khelh mekah England chuan zanin dar 9:30 hian Germany chu semi­final an khelhpui dawn.

May thla khan Eng­land U20 chuan World Cup bakah Toulon Tour­nament nomawi an chawi a, U17 team chuan Euro 2017 final lutin an chak zo lo thung. England U21 hian zaninah Ger­many hi an hneh a nih chuan England youth team-in tun hnai thla hnih chhunga tournament final an khelh vawi lina tur a ni ang.

England U21 hian an squad-ah player bei­seiawm tak tak Sou­thamp­ton midfielder James Ward-Prowse, Chel­sea midfielder Natha­niel Chalobah, Arsenal defender Calum Chambers leh pound maktaduai 30-a Everton zawm hlim goalkeeper Jordan Pickford te an nei a, an ṭha ṭhe ṭhaw hle.

Hetihrual hian Ger­many hi dah hniam ngawt theih an ni bik lo. Bayern Munich player thar Serge Gnabry, Schalke 04 attacking midfielder Max Meyer, Hertha BSC defender Mitchell Weiser leh RB Leipzig striker Davie Selke te awmna an ni a, an en tlak viau ang.

Semifinal lehlamah Spain U21 leh Italy U21 an inhmachhawn dawn bawk a, ram pahnihah pawh hian Europe club lian ten an la inchuh tur players an kuh ṭul.

Spain hian Atletico Madrid-ah pawh player langsar ni phak Saul Niguez, Real Madrid rawlthar duhawm Marco Asensio, season hman zawh taka Barcelona tana match 36 khel thei Denis Suarez-te an kawl a, an chhe lo tih sawi nawn a ngai lo.

Italy tan Spain hneh tur chuan senior team tan pawha vawi kua lo inlan tawh Federi­co Ber­nar­deschi leh Sas­suolo forward Dome­nico Berardi-te an chet ṭhat a ṭul dawn a ni.