Gold Medal nen Jeremy Lalrinnunga a lo haw

Khawvel mit hmuha India leh Mizoram chawisangtu - Mizo tlangval Jeremy Lalrinnunga chu nimin khan Mizoramah a lo haw a, Lengpuiah mi ṭhanhnem takin an lo hmuak.

Lengpui Airport aṭangin Aizawl khawpui panpui niin; Hunthar, Bawngkawn, Ramhlun, Zarkawt, Treasury Square, Sikulpuikawn, Khatla leh Temple Square-ah kawng zawhpui a ni a, kawng tluanin Mizo mipuiten chawimawina an hlan.

Commonwealth Games 2022-ah Mizo tlangval hian weightlifting 67kg huangah - snatch 140kg leh clean & jerk 160kg, total-ah 300kg a chawi a, a tiatpui zingah a chungnung ber.

Ruahman lawk dan chuan, Mizoram chief minister Zoramthanga chuan vawiin hian Jeremy-a hi thingpui a inpui ang. August 10, Nilaini hian Chief of Army Staff hmu turin Aizawl a chhuahsan leh nghal dawn a ni.

Mizote Medal
Lengpui Airport-ah hian Chanchinbumite nen Jeremy-a hi an inkawm. Mizo tlangval chuan, “Hetiang anga tam hian min hmuah ka beisei phak lo, thinlung takin ka lawm takzet.

“Medal hi kan zavaia tan a ni, in mi tawngtaipuina a zarah hetiang hi ka thleng,” tiin Commonwealth Games gold medal a lak chu Mizo mipuite tan a hlan.

Sports Minister Robert Romawia Royte pawhin thu sawiin, “Jeremy-a thawhrimna leh chhelna hi a ropui a, infiammi dangte pawhin entawn se ka duh,” tiin a sawi.

Robert Romawia hian Mizoram sorkar chuan Jeremy leh Lalremsiami Hmar hlawhtlinna chu a hranin, ni dangah ropui taka a la lawm tur thu a sawi tel bawk.

Paris 2024 Thlirna
Paris Olympic-ah chuan, mipa weightlifting huanga inelna chu 61kg, 73kg, 89kg, 102kg leh +102kg te a ni dawn. Hei vang hian Jeremy-a tan Olympic khel tur chuan a khelhna weight tihdanglam a ngai dawn.

Mizo tlangval Jeremy-a hi 67kg huanga khel lai a ni. Vanglaini zawhna chhangin Jeremy chuan, “Kg73 huanga khel turin ka weight ka tirit ang, chumi tur chuan ka inbuatsaih dawn a ni.

“Tun Commonwealth Games inbuatsaih lai pawh khan 315kg te ka chawi thei. Mahse, inelna takah ka inhliam avangin beisei angin ka chawi rit thei ta lo,” tiin a sawi a, a taksa tilian tura hmalak a tum.

Commonwealth Games-ah India tan 73kg huanga khel chu Achinta Sheuli a ni, ani hian 313kg chawiin gold medal a la a, games record a siam hial bawk - a chesual viau a nih loh chuan ani pawh hi India hmachhuan a ni.

Kum 20 mi Sheuli pawhin a ṭhianpa leh zirpui ni bawk Jeremy nen an inel tur thu a lo sawi tawh. Sheuli hian 2014 khan Army Sports Institute, Pune a zawm, hetah hian jeremy te ho nen weightlifting an zir ho a, inelna sang zawkah chungnung zawk nih an inchuh ang.

SYS coach Malsawma Khiangte chuan, “Weightlifting-ah chuan weight category pakhatah hian ram pakhatin infiammi pakhat bak a tir thei lo, chuvangin Sheuli nen an inel dawn. Olympic khel tur chuan India rama ṭha ber nih ngei a ngai,” tiin Vanglaini a hrilh.

Catch them Young
Govt. Complex, Aizawlah 2010 September 24 khan Weightlifting Academy din a ni a, heta ṭang hian Jeremy Lalrinnunga hian bul a ṭan, ani rual hian Zakhuma leh Jacob Vanlaltluanga te pawh 'Catch Them Young' policy aṭangin an chher chhuak bawk.

Anni pathum hi 2013 khan Army Boys Training Centre-ah an chhuk a, he hmuna awm tur hian trial an paltlang. Anni pathum hi international medalist vek an ni a, an zingah Jeremy hi a thleng sang zual ta zel.

Jeremy hian weightlifter nih hi a tum hmasak ber a ni lo, boxing khelh tum kha a pumrua a tet bik avangin weightlifting huangah a lut a, a inzir ṭanna chu mau leh tui pipe bung mai ni mah se, tunah chuan khawvel hriat a ni.

Weightlifting khel tura Jeremy-a sawm chhuaktu Malsawma Khiangte chuan, “Weightlifting kan zir hian rit deuh deuh aṭangin kan zirtir ngai lo a, water connection pipe emaw mau aṭang tein kan zirtir,” tiin Vanglaini a lo hrilh tawh a ni.