De Jong-a'n Barca-a cham a duh

Barcelona president Joan Laporta chuan Frenkie de Jong chungchangah chanchinthar a nei leh ta a, Manchester United hnena hralh an tum player chuan an hnena cham a duh thu a sawi.

United hian pound maktaduai 63.5 thlenga a man sang chho thei turin De Jong hi lakluh an tum a, thla hmasa khan Barcelona nen hian inremna an nei tawh.

Mahse, Barca-in Dutch midfielder hlawh engemawzat an la ba a, De Jong hian Champions League khelh a duh bawk avangin a pu hlui Erik ten Hag-a enkawl United hi a zawm duh lo.

Kum 25 mi De Jong hi Chelsea pawhin lakluh an duh nia sawi a ni a, mahse, Laporta berin a cham duh thu a sawi leh takah chuan a chhuah loh rinna a lian leh hle.

Chutihrual chuan Barca hian De Jong hi a cham dawn a nih chuan a hlawh tihniam turin an ti dawn nia sawi a awm a, nipui transfer-a pound maktaduai 120 chuang senga Robert Lewandowski, Raphinha, Jules Kounde, Andreas Christensen (free) leh Franck Kessie (free) te laluttu Barca hian player tharte hi an la ziak lut thei rih lo thung!

Barca hian club television rights leh in-house production company Barca Studios-a share te hralhin sum an tuak a, mahse, an sum lakluh leh hman a inmil loh avangin La Liga chuan an player lak tharte ziak lut turin, sum lakluh tipung leh phawt turin an hriattir a ni.

Hetiang boruak karah hian Barca hian Chelsea left back Marcos Alonso an dawr reng bawk a, an lalut hnai tawh niin khawthlang media-te chuan an tarlang.

Barca hian pre-season match an khelh hnuhnung berah Pumas UNAM chu 6-0 in an hneh a, Pedri chuan goal hnih khungin Lewandowkski, Ousmane Dembele, Pierre-Emerick Aubameyang leh De Jong ten goal khat ṭheuh an khung.

Catalan club hian August 13, zan dar 12:30-ah tun season-a an league match hmasa ber chu Rayo Vallecano nen an khel dawn a, player tharte an ziah luh hman loh chuan Lewandowkski-te ho kan la hmu thei rih dawn lo tihna a ni.