Man United tan khua a var thei lo

Manchester United-in insiamṭhat duhin Ajax duhlai Erik ten Hag an thlem lut a, a player duh ang apiang an bawhzuisak a, hmana an ropuina ang kha neih let leh theih an inbeisei.

United thuneitute beisei ang ngeiin Red Devils-in hma an sawn ta hret a, an hmasawn danah erawh lawmna tur a la awm chuang lo - season hmasaa 4-0 a an ngam loh Brighton & Hove Albion lakah goal an nei ve tawh a, mahse, 2-1 in an tlawm!

Red Devils ṭantuten pre-season an khelh dan avangin beiseina sang tak an nei a, an movement mawi tak takte chu hahipin an sawi a, an tan khua a var ve taah an ngai a ni.

Mahse, inbuatsaihna leh a tak ram chu thil hrang daih a ni a, Old Trafford-ah harsatna awm loa an hneh tura ngaih Brighton lakah an tlawm - Pascal Gross chuan goal hnih a khung a, United goal khung ve pawh Brighton midfielder Alexis Mac Allister-a'n an lama a tihluh a ni.

Harh rawh u!
United fan-ten Ten Hag an neih hnuah an buaina chu kiam duak turah an ngai a, an beiseina chhem nung turin pre-season-a an match an thlir a, mahse, hriat hmaih an nei - football-ah danglamna thlen turin 'hun' a ngai, tih hi.

Inkhel ṭan aṭanga second 15-na lekah United ben harhin an awm nghal a, Portuguese full back Diogo Dalot tihsual zar zoin Leandro Trossard chuan goal sirah shot a nei - United player-te thin phu a rang khawp ang.

Minute 30-na a ni a, player inremkhawm ṭha leh khelh dan awmze nei zawk Brighton-in goal an khung a, Trossard chuan amah vengtu Dalot-a kapkarah ball pet lutin, mawi zeta United player hlui Danny Welbeck tlan lut chuan Harry Maguire leh Lisandro Martínez a pawt ṭhen a, Gross tana a siamsak chu goal loa mawi lo a ni.

United an insiamṭha hman lo - minute kua a liam a, Solly March chuan ṭha taka ball a lakluh hnuah a 'shot' a, keeper David de Gea chuan lo dang mah se a per lehlam chu Gross bawkin goal-ah a chantir.

Beiseina
Ten Hag-a'n United chhuah-san a duh avanga pre-season tour-ah pawh tel ve lo Cristiano Ronaldo chu bench-ah a dah a, an goal hnihna an chhuah lai hian Portuguese forward hi a lawm lo hle.

Minute 53-naah Fred-a thlak turin Ronaldo hi luhtir a ni a, kum 37 mi forward lansarh lai ber erawh bench aṭanga luhtir a nih lai vel chu a ni - Red Devils hian Ronaldo luh hnuah goal erawh an khung a, Brighton lam khungsak a ni!

United corner aṭanga ball kal chu Maguire-a tihbuai karah Brighton goalkeeper Robert Sanchez chuan a hnek chhuak zo lo a, buai nuai kara petchhuah tumtu Allister chuan an lamah a tilut.

Brighton-in pound maktaduai 88-in an player pawimawh Yves Bissouma leh Marc Cucurella an chân a, director of football Dan Ashworth a chhuak bawk - mahse, an talbuai phah lo. Gross leh Trossard an hmuhnawm a, Welbeck-a'n United a chaih phar dan en chuan Pathianni zana a hmachhawnte aiin Red Devils jersey hak a la phu zawk.

A har a ni
Brighton fan-ten inkhelh zawhah, "Kar tin kan inkhel thei ang em?" tiin United an au el a, United fans tan club tenau ena an en club ṭantuten khati taka an au el kha a na khawp ang - Brighton fan-te hian United khelhpui fo an châk tlat!

Ten Hag-a'n Ronaldo bul a ṭantir loh avangin Christian Eriksen chu 'false nine' angin a hmang a, Danish midfielder hi khel chhia tia sawi tur ni hran lo mah se Dutch coach tan number 9 melh vat a ṭul tih a lang.

United boss Ten Hag chuan, "Tlawm lohna turah kan tlawm a ni. Bul kan ṭan ṭha a, mahse, goal kan chhuah hnuah kan khel chhe sawt a, kan inrintawkna kan hloh a, tihsual kan neih avangin min hrem zui a ni.

"Team ṭha tak kan tum a, rei tak lo inkhel ho tawh an nih avangin tihsual kan neih chuan, khatiang team chuan min hrem nghal zel thei a ni," a ti a, an result-ah a lawm lo.