Hei le - Haaland a lo thleng ta!

Community Shield a khelh ṭhat loh avanga sawisel hlawh Erling Haaland chuan amah sawiseltute a chhanglet nghal a, Premier League-a a match hmasa berah goal hnih a khung!

Pathianni zan khan City hian khualmualah team ṭha West Ham an lenchilh a, Haaland-a goal hnih khung hmangin 2-0 in hnehna an chang - Hammers-in chak loin season bul an ṭan e.

Kum 22 mi Haaland hian minute 36-naah goal hmahruai a khung a, a goal khung hi penalty aṭanga a chhuih luh a ni a, ama hlawhchhuah a ni.

Hammers hian minute 29-na lekah hliam vangin goalkeeper Lukasz Fabianski an lakchhuah a ngai a, kum 37 mi keeper aiah hian Paris Saint-Germain aṭanga a ngheta an lakluh thar Alphonse Areola chu a lut.

Kum 29 mi keeper hian khelmualah hun a hmang rei hman lo - Haaland dan dan ṭha bera a hriat chu tih tluk a ni a, Norwegian striker lakah penalty a chawi.

Haaland-a'n penalty hi chiang zetin goal-ah a chantir a, goal dang lut loin chawlhlawk an hmang. Minute 65-naah Haaland bawk kan hmu nawn. City midfielder thiam bik Kevin de Bruyne-a ball pek ṭha zet chu Haaland hian um lutin goal-ah a chantir a, striker class sang a nihzia a pholang.

West Ham-in a tir lamah City zuam ve viau mah se, a rei tial tial a, City ṭhatna a lang tial tial a, a tawi zawnga sawi chuan Hammers hian Premier League champion hi an chelh ngang lo!

City tan midfielder thar Kalvin Phillips chu minute 89-naah luhtir a ni a, Leeds United aṭanga an lakluh thar player hi boruak thar an tem tir ṭan.

Phillips bakah hian Bernardo Silva, Riyad Mahrez leh Julián Álvarez te chu bench aṭanga luhtir an ni bawk a, City squad en hian Premier League champion tum ve dang team tan chuan muttui lohna tham a ni.

Tlarhmaah Haaland a hmuhnawm takzet a, he player hi De Bruyne leh Phil Foden ten an chawm ṭhin dawn avangin goal a la khung dawn chauh tih a chiang a, ball ṭha hmu tura a tlan kual tam leh taimak dan chu fak tlak a tling.

City boss Pep Guardiola chuan, "Community Shield zawhah kha chuan Haaland hi a hlawhchham der angin an sawi a, Premier League-ah a insiamrem an ring lo. Goal khung thiam Alan Shearer leh Gary Lineker te hi chu goal khung sa renga piang an ni a, ka zirtir belh thei lo," a ti a, Haaland chu goal khung tur bik a nih thu a sawi.

Spanish coach chuan sawi zawmin, "Haaland hi box chhunga kan team tichaktu tur a ni a, a insiamrem hma hle. A khelhpuite nen pawh an innel tawh viau - ka team te an khel ṭha takzet a, Haaland kan la nei zui a, mahse, hma a la sawn thei tih a inhria ang.

"Manchester City kan nihna angin kan chak a, kan hlimin a nuam kan ti a, hei hi kan duh tak chu a ni e," tiin a sawi - Man City kan la hmu dawn chauh e!