Bethlehemin Sanga leh Chawnpui beiseina titawp

I Day Football-ah nimin khan MPL club thar FC Bethlehem chuan 1-0 in Chawnpui FC an hneh a, Lalsangzuala Hmar hote semifinal beiseina a thamral.

RG Stadium-a inkhelh ṭan hmain Bethlehem tan semifinal luh theihna tlem a inhawng a, Victor Lalbiakmawia hoten semifinal beisei ngam chiah lo mah se point hmu loa I Day Football 2022 khar an tum lo.

Bethlehem leh Chawnpui ten inkhel nung ṭha tak an pholang a, goal chance pawh a ṭhahnem. Chawnpuiin chance ṭha an ngah zawk nachungin Bethlehem an chungnung hret a, tawnhriat nei ṭha Lalrammawia'n first half-ah penalty a hlah.

Chawnpui tan point khat a hlu a, point an hlawhchhuah hrim hrim chuan Venghnuai tan semifinal lut turin chak ngei a ṭul dawn. Coach Lalsangzuala Hmar hote point khatah an lungawi lo a, point thum hlawhchhuah ngei an tum tih an khelh danah an pholang.

Coach Sanga hote goal hmaah an vannei tawk lo a, K. Vanlalhriatzuala'n hun ṭha a bawhpelh bawk. Minute 70-naah Bethlehem zawkin goal an khung a, penalty hlahtu Rammawia'n a tihsual siam ṭhat nan ṭha zetin box pawn aṭangin a pet goal. Rammawia hi a vanneih ṭum ni se hattrick siam thei a ni a, first half-a penalty a hlah bakah chance ṭha bik a hlah leh bawk.

Point thum hlawhchhuah tumtu Chawnpuiin goal an khung thei lo a, Bethlehem 1-0 in an chak. Coach Victor-a hote hi chak mah se goal difference a ṭhat loh avangin hnehna an chan zawh hian semifinal an thleng zo dawn lo tih a hriat theih a, Chawnpui erawh Aizawl FC goal lia an chak chuan tling thei an ni. Mahse, Aizawl FC hian goal li an khungsak lo a, I League club hian Venghnuai an hneh loh avangin Chawnpui hi an tla ta tho.