I League club ngamtu FC Venghnuai

I Day Football-ah FC Venghnuaiin nimin khan I League club Aizawl FC chu 3-1 in an hneh a, group A hmahruaitu ni chungin semifinal an lut. Venghnuai leh AFC inhmachhawn hma hian Chawnpui an chak loh avangin I League club hian semifinal an lut tawh a, hemi a nih avang hian nimin RG Stadium-a inkhel hnuhnung zawk hi group hmahruaitu zawnna a ni ber zawk.

Transfer bazarah Aizawl FC-in an mit it zawng an hlah meuh loh avangin FC Venghnuai aiin an buk a rit zawk a, mah se khelmualah erawh Lalrindika Hmar enkawl Venghnuai an nghet ṭha zawk.

Venghnuaiin bul an ṭan ṭha a, Armed Veng South tlangval Lalram-muanpuia'n (Apuia) minute 13-na lekah a chance ṭha neih chu kawh zetin a pet goal. Apuia hian Peter Lalrinhlua leh Vanlalthanga te thawhrah sengin minute 36-naah a khung belh leh bawk.

Aizawl FC-in MS Dawngliana hmangin minute 41-naah siphurh an sut ṭhen a, Bawngkawn tlangval hian goal la luh hmain goal ruakah khung lo mah se a tihsual a rawn siam ṭhaah a ngaih theih.

Second half-ah coach Rindika Hmar-in goal neih humhim tumin tlarhnung a thuam chak. Aizawl FC erawhin si phurh sut ngei tumin Inter Village 2022 top scorer R. Ramdinthara bakah Lalrosanga leh David Lalhlansanga te luhtir mah se goal an khung thei lo.

I League club goal bawh a na zawk a, Venghnuaiin corner kick an hmang ṭangkai thung. Minute 77-naah Venghnuai defender Lalruatfela'n a tauh goal a, Rindika Hmar hoten 3-1 in hnehna an chang.