Sindhu leh Lakshya Sen ten gold an la

Commonwealth Games 2022-ah India badminton star pahnih PV Sindhu leh Lakshya Sen ten gold medal an la. Birmingham-a neih inelnaah hian mipa leh hmeichhe singles-a gold medal an lak bakah mixed team-ah India-in silver an la a, Srikanth Kidambi-a'n men's singles-ah bronze medal lain women's doubles-ah Gayathri Gopichand leh Treesa Jolly ten bronze medal an la bawk.

Hmeichhe badminton singles-ah hian PV Sindhu hi seeded number 1 a ni a, second round aṭangin a khel ṭan. Sindhu hian second round-ah Fathimath Abdul Razzaq chu harsatna nei loin 21-4, 21-11 in a hneh a, third round-ah Husina Kobugabe chu 21-10, 21-9 in a hneh leh bawk.

Quarterfinal-ah erawh Sindhu hian Malaysian shuttler Goh Jin Wei lakah set hmasa ber la mah se 19-21, 21-14, 21-18 in an lehthal. Semifinal-ah Sindhu hian Yeo Jia Min (Singapore) chu 21-19, 21-17 in an hneh leh a, final-ah Canadian shuttler Michelle Li chu 21-15, 21-13 in a hneh.

Sindhu hian kum 2014 khan CWG-ah bronze a la a, kum 2018-ah silver medal la lehin tun ṭuma gold medal a lak hi Commonwealth Games hmeichhe singles-a gold medal a lak hmasak ber a ni.

Mipa inelnaah champion lai Lee Chong Wei chu kum 2019 khan badminton khelh a chawlhsan avangin a inlan lo a, seeded no. 1 Loh Kean Yew pawh quarterfinal-ah a tla. Bengali tlangval Lakshya Sen hi seeded number 2-a a ni a, final-ah Srikanth Kidambi leh seeded no. 1 hnehtu Ng Tze Yong chu 19-21, 21-9, 21-16 in a hneh.

Srikanth Kidambi hian pathumna inchuhnaah Jason Teh chu 21-15, 21-18 a hnehin bronze medal a la ve bawk.