Man United-in Arnautovic an rim

Premier League match hmasa bera tlawm Manchester United chuan Bologna forward Marko Arnautovic chu lakluh tumin an hel a, khawthlang media-te chuan Red Devils hian pound maktaduai 6.8-in Austrian striker hi lei an tum niin an sawi.

Mahse, United boss Erik ten Hag chuan inkhelh zawha Arnautovic chungchang an zawhna chu fiamthuin a chhang a, "Player 250 nen sawizawm kan ni tawh," a ti - media thuthang satliah tam lutuk a kap let.

Ten Hag hian Arnautovic lakluh ngei erawh a tum niin khawthlang media-te chuan an tarlang a, Dutch club FC Twente-a United assistant coach Steve McClaren nena an lo thawhpui tawh player hi Old Trafford-ah seng luh a châk.

United hian nakin hun thlirin, squad din an tum mek a, kum 19 mi Red Bull Salzburg forward Benjamin Sesko nen pawh sawizawm an ni mek - mahse, Brighton laka an result thlirin 'tun hun' atana ṭha player pawh an mamawh.

Austria international Arnautovic hi Premier League-ah pawh lo tlangnel tawh sa a ni a, kum 33 mi striker hian Stoke City leh West Ham tan pawh a lo khel tawh.

Chutihrual chuan a kum a tam tawh piahlamah, striker class sang tia sawi tur a ni lem lo. Stoke tan inelna hrang hrangah match 145 khel hmanin goal 26 a khung a, Hammers tan match 65-ah goal 22 a khung bawk.

West Ham aṭang hian Chinese Super League lamah pemin, Shanghai Port tan match 39-ah goal 20 a khung. Season hmasa ṭan dawn khan European football-ah kirin Bologna a zawm a, match 34-ah goal 15 a khung.

Arnautovic theihna leh thiamna enin, United hian lalut ta pawh ni se Old Trafford lam tan chuan lawma zuan tawr tawrna tur chu niin a lang lo.

Hetihlai hian United hi Juventus midfielder Adrien Rabiot nen pawh sawizawm mek an ni a, Italian club-a thla 12 chiah contract nei tawh hian Old Trafford pan a hreh kher lo ang.

Red Devils hian Barcelona midfielder Frenkie de Jong an la beisei ve reng tih erawh hriat tel a ṭha a, Dutch midfielder thutlukna hian Rabiot nena an indawrna thui takin a hril a rinawm.