Wolves-in Guedes an lalut dawn

Premier League club Wolverhampton Wanderers chuan Goncalo Guedes an lalut dawn a, nimin khan medical nei tura England a pan tawh avangin he thuziak i chhiar meuh chuan an inlalut fel tawh hial mai thei.

Kum 25 mi forward manah hian Wolves chuan pound maktaduai 27.5 an inseng dawn a, hun rei tak chhung atana contract a ziah tur thu tarlan a nih avangin kum nga tal chu contract a ziah a rinawm.

Wolves manager Bruno Lage chuan Guedes hi nipui transfer-a lakluh a lo tum sa tawh a, striker chhuanvawr Raul Jimenez a inhliam zui avangin Guedes hi ngawrh lehzualin an rim zui ta a ni.

Portugal tan vawi 32 inlana goal sarih khung thei Guedes hian season hman zawh takah khan Valencia tan inelna hrang hrangah match 42 khelin goal 13 a khung a, assist vawi ruk a nei bawk.

Winger leh striker anga chhawr kawp theih Guedes hian an ram club ṭha Benfica aṭangin a professional career a ṭan a, Portuguese second division lamah B team tante pawh a inlan a, senior team tan match 67-ah goal 11 khungin assist vawi 16 a nei.

January 2017 khan Paris Saint-Germain a pan zui a, mahse, euro maktaduai 30 zeta a zawm club tan hian match 13 chiah a khel hman - goal a khung lo a, assist vawi khat a nei thung.

PSG tana a khelh laia loan-a laluttu Valencia-in 2018 khan €40mtd-in a nghetin an lalut zui a, Spanish club tan hian match 178-ah goal 36 khungin, assist vawi 30 a nei hman a, 2018-19 khan Copa del Rey champion a nihpui.

Wolves hian season hman zawh takah khan Premier League-ah goal 38 chiah an khung a, anni aia khung tlem chu Championship lama tla thla pathum, Burnley (34 goals), Watford (34) leh Norwich City (23) chiah an ni.

Portuguese coach Bruno Lage enkawl Wolves hian Inrinni khan tun season-a an league match hmasa ber khelin Leeds United chu 2-1 in an ngam lo a, Jimenez awm loh karah Hwang Hee-chan chu tlarhmaah a mal tlat a, a khel ṭha lutuk tlat lo.

Hetihlai hian Wolves hian captain Conor Coady chu an chhuahtir hnai a, Everton nen an indawr mek. Kum 29 mi centre back hi Leeds laka an tlawmna inkhelah khan bench-ah a ṭhu a, coach Lage-a'n Max Kilman leh lak thar Nathan Collins a ring zawk.

Hei vang hian Coady-a'n a khelh phakna tur club pan a duh a, Liverpool academy chhuak ni mah se kum tawpa World Cup khelh a duh avangin a khelh tam theihna tur Everton pan a duh - loan-in a zawm dawn a, he thuziak i chhiar meuh chuan an inlei fel tawh hial mai thei.