Bournemouth-in Barca keeper lalut

Premier League kai thar Bournemouth chuan Brazilian goalkeeper Neto chu Barcelona aṭangin free transfer-in an lalut a, kum 33 mi keeper hian Cherries tana thla 12 chhung khel turin contract a ziak.

Bournemouth chief executive Neill Blake chuan, "Neto-te ang keeper ṭha kan hip thei hi ka lawm takzet a, club tan chuan hlawhtlinna ropui tak niin, keini min thlang hi kan lawm hle a ni.

"Level sang taka tawnhriat nei ṭha keeper a ni a, kan tan a ṭangkai khawp ang," tiin a sawi a, Barcelona tana vawi 21 inlan thei keeper an chang chu a phur hle.

Brazil tana vawi khat inlan tawh Neto hian an ram club Athletico Paranaense aṭangin professional zinkawng a zawh ṭan a, January 2011 khan Serie A club Fiorentina zawmin, European football a hmelhriat ṭan.

Fiorentina tan hian vawi 101 zet si ban a nghak hman a, kum 2015 khan Italian club ṭha Juventus chuan an thlem chhuak - Juve tan Serie A (2), Coppa Italia (2), Supercoppa Italiana (1) nomawi a chawi a, a hlawhtling hle.

Mahse, Italian club ṭha tan hian season hnih chhunga match 22 chiah a khelh avangin mimal ang chuan a hun hman hi hlawhtling tia sawi a rem lo a, kum 2017 khan Valencia a pan.

Spanish club-ah hmun pawimawh chang nghalin, season hnih chhungin match 80 zet a khel a, Copa del Rey nomawi a chawipui. Mahse, June 2019 khan Barcelona a pan a, a man zat hi euro maktaduai 26 niin, a khelh ṭhat dan a zira €9mtd pek belh tur a ni.

Mahse, Barca-ah hian Marc-André ter Stegen a awm avangin khelhna hmun a chang tam tawk lo a, season thum chhungin match 21 chiah a khel. 2020-21 season kha a inlan tam ber ṭum niin, Barca tan inelna hrang hrangah match 12 a khel.

Neto hi kum 2012 khan Brazil Under-23 team-ah telin Olympic football-a khel a, silver medal a lakpui a ni.

Bournemouth hian nipui transfer-ah Joe Rothwell, Ryan Fredericks leh Marcus Tavernier an lo lalut tawh a, Neto hi an player lakluh palina a ni - an match hmasa berah 2-0 a Aston Villa an hneh avangin Scott Parker-a enkawl Cherries hi an phur vanglai tak a la ni rih.