FIFA Confederations Cup Portugal Vs Chile

Zanin dar 11:30 hian FIFA Con­federations Cup semifinal-ah Portugal leh Chile an inkhel dawn a, Sony Six-ah a en theih ang.

Russia rama inelna neih mek hi July 2, Pathianni zanah final khelh a ni dawn a, semifinal hnu­­hnung zawk hi June 29 zanah Germany leh Mexico ten an khel ang.

Hmasawn leh tlahniam
Portugal-in an match hmasa berah Mexico hmachhawnin ṭum hnih ngawt hruai mah se an humhim zo lo ve ve a, point khat bak an hlawh chhuak lo.

Match hmasa berah hian Cristiano Ronaldo chu man of the match a ni tho a, match hnihnaah Portugal captain hian inelna thlengtu Russia lakah chakna goal leh goal awmchhun a khung.

Match hnuhnung berah pawh Ronaldo bawkin bul ṭanin New Zealand chu 4-0 ngawtin an sawp a, match tinin European champion-in hma an sawn a ni.

Chile-in Cameroon 2-0 a hnehin bul an ṭan a, hemi ṭum hian inkhel thunun chungin goal khung thei lawk lo mah se an thiampuipa Alexis Sanchez luh hnuah goal hnih hi an khung.

World champion Germany lakah pawh Chile hian nung takin bul an ṭan a, Gunners forward Sanchez-a'n hma takah khung mah se an goal neih an humhim zawh loh bakah hun tawp lamah an goal nawr a na tawh lo.

Group match kharna in­khelah Chile-in point khat chauh an mamawh a, amah­erawhchu Australia laka goal an chhuah hmasak avangin an talbuai hman hle. Copa America champion hian semifinal thleng turin second half-ah siphurh sutna goal an khung a, a thiam pali zingah invawrh kai mah se an ṭhat dan berin an khel chhuak tawh lo.

An thlir tawi?
Zanina an inkhelhna tur Kazan Arena hi Portugal leh Mexico te inhnehtawkna hmun kha a ni a, coach Fernando Santos hian a team hi Euro 2016-ah a champion pui theih avangin hma thlir thui tak a nei ang.

Amaherawhchu, Portugal boss hian team nem bera ngaih New Zealand an khelh ṭumin tlarhma lamah sa huai a ser a, he thuthlukna hian Chile lakah a vaw let thei a, ngai an awh hman a nih pawhin hrem vanga defender tawnhriat nei ṭha Pepe khel thei lo tur hi an tawrh a rinawm.

Portugal player pawimawh Cristiano Ronaldo, Joao Mou­tinho, Andre Gomes leh Ber­nardo Silva ten season hahthlak tak an hmang zo a, an thiamna chungchangah inhnialna tur awm tawh lo mah se eng ang chiaha tlo leh huaisen nge an ni tih zanin hian fiahin an awm dawn.

Inkhel dang ang bawkin Ronaldo chu Chile tan ven uluk bik tur a ni a, hemi karah hian AC Milan striker thar Andre Silva a langsar thei bawk. Kum 21 mi Andre Silva hian New Zealand lakah goal a khung a, bench-ah a ṭhu emaw starting eleven a chang pha a nih pawhin a buai lo ve ve ang.

Chile ṭha zawk
Chile hian 2004 Copa Ame­rica group stage an paltlang zawh loh hnuah inelna lianah a zawnin vawi sarih knockout stage an inpetling. Chung inel­na te chu FIFA World Cup vawi hnih, Copa America vawi li leh Confederations Cup te an ni.

Australia nen Chile hi an che rang tawk lo tiin sawi mah se an rilru lam erawh an la inpeih ṭha a, an huaisen bakah player an neih ṭhat avangin champion tura rinkai an la ni reng. Copa America kum zawna champion thei Chile hian Sanchez, Bayern Munich midfielder Arturo Vidal leh Manchester City keeper Claudio Bravo te an kawl a, position tinah tawnhriat nei ṭha player an rem thei a ni.

Bayern midfielder Vidal chuan, "Ronaldo-a'n hun duh­awm tak a hmang mek a, chutihrualin Portugal hi amah­ah chiah an innghat lo. Portugal ang thoa team ṭha hi kan tum tawh a, ṭha takin kan khel ṭhin. Tun ṭumah pawh hian kan mamawh tur chu inrintawkna a ni," tiin a sawi.

Portugal leh Chile hi vawi thum an inhmachhawn tawh a, La Roja hian chak an la nei lo. Portugal erawh vawi hnih chakin ṭum khatah erawh an inhnehtawk thung.