Vanglaini Biangbiakna Michael Chopra a lo thleng tawh

Rajiv Gandhi Stadium-ah Haiti international Sony Norde, Rangers tana Champions League hial lo khel tawh Darryl Duffy, LA Galaxy striker hlui Cornell Glen leh Middlesbrough defender hlui John Johnson-te meuh pawh an lo inlan tawh a - Inrinnia inkhel tur Michael Chopra ropuina tluk pha erawh an awm lo.

PFA Team of the Year-a ṭum hnih ngawt lang thei striker hi July 1-a FPAI XI leh Mizoram XI inkhelh hunah FPAI jersey ha chungin a inlan dawn a, nimin khan Aizawl a rawn thleng tawh.

Vanglaini chuan Newcastle United striker hlui biangbiakna a nei nghal a, a thusawi hmasak ber chu, "RG Stadium-a inkhelh ka chak tawh," tih hi a ni.

Chopra bulṭanna

England tan U16, U17, U19 leh U20-ah Chopra a inlan vek tawh a, player ṭha a nihzia pholangtu vek an ni.

Kum 33-a upa striker hi thisenah Indian ni mah se Newcastle a piang leh seilian a ni a, kum 1993 khan a seilenna club Newcastle United chuan an hnena inzir turin an lalut. Magpies-in an khaw chhuak tlangval hi October 2002 khan a professional contract hmasa ber an ziahpui.

Chopra-a'n Magpies-ah kum li hun a hmang a, St. James' Park-a a châm chhungin Watford, Nottingham Forest leh Barnsley-ah te loan-in chhuahtir. Hornets (Watford sawina)-ah hian match ruk khelin goal nga a khung a, Forest tan match ngaah goal khung lo mah se Barnsley tan League One-ah match 39 khelin goal 17 ngawt a thun.

Record neitu Chopra

Barnsley-a season duhawm tak a hman hnuah Chopra hi Magpies lamah a kir a, 2005-06 season-ah inelna hrang hrangah match 20 khelin goal thum a khung.

April 2006-ah Chopra-a'n Premier League record buah a hming a ziak kai a, Premier League-a substitute goal khung rang ber ni turin Sunderland lamah goal a khung - a hun mamawh zat chu second 15 a ni.

Chopra chuan a hun tawn hi thlirkirin, "Ball-in net a tawn puar pawp lai kha ka hmu a, a ropui thlawt a ni. Thinlungah hian nuam tih veng vengna a awm a, ka dah pawimawh ber ṭhin erawh mimal hmingṭhatna ni loin kan team-in hnehna an chang em? tih hi a ni ṭhin," tiin Vanglaini hnenah a sawi a, RG Stadium-ah pawh chak loh a duh dawn lo.

Chopra tan harhna

England tan age level hrang hranga inlan tawh siin Michael Chopra-a'n Magpies-ah hmun pawimawh a chang lo - Newcastle-ah Alan Shearer, Michael Owen leh Shola Ameobi an awm avangin league match 13 chiah a khel. Hmasawn zel turin khelh tam a mamawh tih a inhria a, Cardiff City a zawm.

Cardiff-ah Chopra a hlawhtling nghal a, league match 42 khelin goal 22 ngawt a khung - PFA Team of the Year-ah a lang phak hial.

Newcastle hmelma Sunderland-in Indian striker an hmuh hmaih lo, a hma kum lawka Cardiff-in £500,000-a an lei striker hi pound maktaduai ngain an lalut a, a hunlaia player man zat ngaihtuahin Michael Chopra man zat hi a tam tham hle.

Cardiff lo chu

Sunderland-ah Chopra-a'n hmun pawimawh changin a season hmasa berah league match 33 a khel nghal a, goal ruk a khung - Black Cats tan hian a match hmasa berah goal a khung nghe nghe.

A season hnihnaah erawh Sunderland-in Djibril Cisse leh El-Hadji Diouf an lakluh avangin Chopra hi Cardiff-ah loan-in a kir leh. Chopra-a'n 2009-10 season ah Cradiff tan league match 41 khelin goal 16 a khung a - PFA Team of the Year-ah a

ṭum hnih nan a lang.

Cardiff-a Chopra-a'n season a hman hun chhung belhkhawm hi season li a ni a, match 159 khelin goal 63 a khung - Chopra vanglai bera chhal theih a ni. Cardiff a chhuahsan hnuah hian Ipswich Town, Blackpool, Kerala Blasters leh Alloa Athletic tan a khel leh tawh.

Shearer-a zirtir!

Michael Chopra-a'n khawvel striker zinga hming dai tawh lo tur Alan Shearer leh Michael Owen te meuh a khelhpui tawh a, an hnen aṭanga thil tam tak a zir thu Vanglaini a hrilh.

"A bik takin Shearer kha zirtirtu ropui tak a ni a, a hnen aṭang khan thil tam tak ka zir a ni. Anni hnen aṭanga thil ka zir ang chiah khan Indian player-te hi pek let neih ve ka duh," a ti.

RG Stadium-a an inkhel tur thlirin, "Mizoram football-in hma a sawn zia kan hre vek a, an hmasawnna hi a hmunah ngei a taka rawn hmuh ve ka duh. Mizo player-te hi eng ang taka ṭha nge an lo nih reng tih hi hriat ka duh a, inkhelh a chakawm tawh hle," tiin a phur vanga lo thleng hma a nih thu a sawi!

Inhmu ila...

Kum 33-a upa striker chuan, "India ka rawn kal hmasak ber khan football dinhmun a la hniam em em a, tun ai hian ngaihventu pawh an la tlem zawk. Mahse, ISL khel tura ka lo kir hnuah erawh hmasawnna hmuh tur a tam em em a, chu hmasawnnaa Mizoramin tha in thawh hnem hi a ropui a ni," a ti.

"Ka sawi tawh angin inkhelh hlan ka nghakhlel tawh a, a bik takin Mizo player-te ka en dawn a ni," a ti a, India rama 'Mizoram' chanchin an sawi ṭhin chu a tak a nih leh nih loh fiah a tum - Newcastle United leh Sunderland striker hluiin RG Stadium a mawi dawn e.