NBA player hlu ber Westbrook

NBA regular season liam ta chhunga player leh coach cheṭhate hnenah lawmman sem a ni a, Oklahoma City Thunder point guard Russell Westbrook chu Most Valuable Player (MVP) atan thlan a ni.

Kum 28 mi Westbrook hian season duhawm a hmang zo hlim, regular season bikaha khan Thunder tan chawhrualin match tinah point 31.6 score-in rebounds vawi 10.7 a lak bakah assists vawi 10.4 nei ziah anga chhut a ni.

Kum 1961-62 khan Oscar Robertson chuan chawhruala match tin triple-double neiin MVP chawimawina a dawng tawh a, kum 55 hnuah Westbrook-a'n a dinhmun ang a rawn ṭawmpui ve leh ta chiah a ni. Season liam ta khan Westbrook hian triple-double vawi 42 zet neiin Robertson-a record hi a khum chiah bawk.

American star Westbrook hian a team hi Western Conference-ah parukna nih puiin playoff a hruai thleng a, playoff-ah erawh Houston Rockets 4-1 in an ngam lo.

Coach ṭha thlan tura chhawp chhuah zingah Hous­­ton Rockets coach Mike D’Antoni chuan San Antonio Spurs coach Gregg Popovich leh Miami Heat coach Erik Spoelstra te khumin lawmman a dawng.

Mimal chawimawina langsar dang zingah Golden State Warriors forward Dray­mond Green chuan Defensive Player of the Year lawmman a dawng. Green hian tun hnai seaon thum chhungin Warriors hi NBA nomawi vawi hnih a chawipui thei a ni.