San Diego neitu zingah Eden Hazard

Chelsea chhuanvawr Eden Hazard chu USA-a club din thar tur neitu nihna nei tur zingah a tel a, amah bakah hian Crystal Palace player Yohan Cabaye, Chelsea striker hlui Demba Ba leh Lille forward hlui, tuna Al Ahli player Moussa Sow-te chu San Diego-a inbengbel tur club neitu nihna nei thar zingah hian an tel bawk.

San Diego club hian season thar aṭang­in North American Soccer League-ah an khel ṭan dawn a, NASL hi USA-a an second division club niin Major League Soccer hnuaia inelna a ni a, April 2018-ah season thar hi khelh ṭan a ni ang.

Hazard chuan, "Inelna hmachhawna, hnehna chan thuai thuai kan chak a ni. San Diego hi hmun nuam tak a ni a, he hmuna football an ngainat dante ngaihtuahin kan tan chuan he khawpui ngeia club neih tluka duhthlan tur dang a awm chuang lo. Kan mang ram chu a taka kan chantir theih tak avangin kei leh ka ṭhiante hi kan lawm takzet a ni," a ti.

Belgium forward Hazard, France midfielder Cabaye, Senegal strikers Ba leh Sow-te hi football player ni lai emaw lo khel tawh ṭhin zinga NASL-a club nei hmasa ber tur an ni lo a, anni hma hian Italy leh AC Milan legend Paolo Maldini chu Miami FC neitu zingah a lo tel tawh.