Palace boss thar Frank de Boer

Crystal Palace chuan an manager thar ni turin Frank de Boer chu Thawh-ṭanni zan khan an lalut. Dutch manager hi kum thum chhung atan contract an ziahpui a, kum khatah pound maktaduai 2.5 vel hlawh tura ngaih a ni.

Palace hi season hman zawh taka Premier League-a inhamtanpuitu Sam Allardyce chuan 'chawlh hahdam' a duh avangin a chhuahsan a, English manager hmun­ruak hi De Boer hian a luah dawn ta a ni.

Netherlands tana vawi 112 inlan thei De Boer chuan, "Kan tum ber chu Premier League club ṭha pawl nih a ni a, relegation vela talbuai reng tur kan ni lo. Chu chu kan thil tum ber chu a ni a, a aia

ṭha leh­zuala kan khel thei a nih pawhin a lawmawm lehzual ang," a ti.

Kum 47-a upa mana­ger hian 2010-16 chhung khan Ajax a enkawl a, Dutch club hi 2011-15 inkarah a zawnin season li chhung league nomawi a chawipui. Kum 2016-a Ajax a chhuahsan hnuah Inter Milan pan mah se beisei a phak lo a, ni 85 chiah San Siro-ah hian a cham hman tihin November khan ban a ni.

Player a nih laia Ajax leh Barcelona tan pawha lo khel tawh De Boer chuan sawi chhun­zawmin, "Premier League club enkawl ringawt pawh hi chona duhawm tak a tling tawh a, he club hian hma a sawn zel theih hi ka ring tlat a ni. Transfer bazar-ah pawh sum tam tak an seng a, heng kan sum hmangte hian hna ṭha tak a thawh theih ang tih ka chiang a ni," a ti.

Premier League a pan hmaa Manchester United boss hlui Louis van Gaal a rawn thu sawitu De Boer chuan, "Mahni tihdan phung leh kalphung hran nei ka ni a, ball kan chan loh lai pawha inkhel thunun tlat hi ka duh dan a ni," tiin coaching style hranpa a neih thu a sawi.

Eagles chairman Steve Parish chuan, "De Boer kan nei thei hi kan club tan a hlimawm takzet a, vawiinah hian lungphum pawimawh tak kan phum a ni. De Boer nena kan thawkho tur hian minti lawm a, ani kaihhruaina hnuaia hlawhtlinna kan chan turte thlirlawkin ka phur hle," tiin Dutch manager an lalut thei chu a lawm thu a sawi ve bawk.