Reds-in Moreno dawrtu Napoli an hnar

Serie A club Napoli chuan Liverpool left back Alberto Moreno lakluh tumin Reds dawr mah se Merseyside club hian Napoli-in pound maktaduai 11-a an dawrna chu an hnar a, Spanish defender manah hian pound maktaduai 15 tal hmuh an inbeisei a ni.

Kum 24-a upa defender hian season hman zawh takah Liverpool tan hmun pawimawh chang phak lo mah se duhtu erawh a van lo hle. A club hlui Sevilla chuan Moreno hi laklet an duh nia sawi a ni a, Serie A club zingah AC Milan leh Inter Milan chuan an thlithlai uluk hle bawk.

Liverpool boss Jurgen Klopp chuan season hmasa khan a left back neihsa Moreno hi ring ngam loin midfielder James Milner chu left back-ah a chher chawp a, hetiang a nih avang hian Moreno tan chuan chhuah hi a finthlak zawk.

Reds hian defender Mamadou Sakho chu chhuahtir an tum bawk a, France international manah hian pound maktaduai 30 aia tlem dawn an tum lo. Reds hian tun hnai transfer bazar-a centre back man zat leh loan-a hun a hmanna Crystal Palace-a kum 27-a upa defender chet ṭha dan ngaihtuahin heti zat sum hmuh theih hi an inbeisei a ni.

Liverpool hian pound maktaduai 34 man Mohamed Salah an lakluh tawh avangin winger Lazar Markovic chhuahtir an hnial lo nia sawi a awm bawk. Kum 23-a upa winger hian kum thum kal taah khan Benfica aṭangin Reds hi pound maktaduai 20-in a zawm a, Fenerbahce, Sporting Lison leh Hull City-ah te loan-in a khel hman.

Hull-a Markovic lo enkawl tawhtu. Watford manager manager thar Marco Silva chuan Serbian winger hi a duh nia sawi a awm a, Zenit Saint Petersburg chuan an beisei ve mek bawk.