Federer leh Nadal telna tur Wimbledon

Kuminah Grand Slam pahnih Australian Open leh French Open khelh a ni tawh a, tennis inelna lianah hian Roger Federer leh Rafael Nadal ten nomawi an chawi. July 3, Thawhṭanni aṭangin Wimbledon khelh ṭan a ni leh tawh dawn. Tennis legend pahnihte hian inkhel ropui min hmuh tir leh ang em tih chu khawvel hriat chak a ni.

Swiss super star Federer hian January thla khan Australian Open nomawi chawiin mipa zinga Grand Slam champion hnem ber (18 titles) a nihna a belhchhah. Spain tlangval Nadal hian June thla tir lam khan a vawi 10 nana French Open title lain major title 15 a khawl khawm ve tawh bawk.

Ropui ber!

Tennis khawvela player pahnih inelna ropui ber thlen tirtu Federer leh Nadal te hi 2008 Wimbledon final khan an lo intawng tawh, khatihlai khan Nadal hi kum 22 mi chauh a la ni, a zawna vawi nga champion tawh Federer lakah 6-4, 6-4, 6-7(5), 6-7(8), 9-7 a hnehna changin nomawi a chawi - he final hi darkar li leh minute 48 zeta rei khelh niin Wimbledon final an khelh tawh zinga rei ber a ni.

Grand Slam vawi sarih champion John McEnroe chuan, "Tennis inkhel ka hmuh ve tawh chinah chuan a la ropui ber," tiin he final chanchin hi a sawi, he thuah hi chuan tennis ngainatute zingah McEnroe thusawi ṭawmpui thei lo an tam lo khawp ang.

Nadal a zam lo

Kum 31-a upa Nadal hian nikum khan a banrek na vangin Wimbledon hi a khel thei lo. Kum 2011 final-a Novak Djokovic a hneh loh hnuah grass court inlena lianah hian a thleng sang nawn leh tawh rih lo.

Nadal-a'n Wimbledon nomawi a chawi hmasak zawk (2008) khan All England Club-a a inlan hma hian Paris-ah set hloh loin a champion thei. June thlatir lam khan Nadal hian set hloh loin Roland Garros nomawi a chawi leh a, tun hma lama a tih theih ang ti nawn turin inrintawkna a nei ang.

World number 2 Nadal chuan, "Grass hi ka inkhelh thiamna ber hmun chu a ni lo. Mahse, inrintawkna ka nei," tiin a zam loh thu a sawi. Nadal hi Aegon Championship aṭanga a inhnuhdawh avangin grass court-a inbuatsaihna tournament khel loin Wimbledon a hmachhawn dawn a ni.

King of Clay tia hming lem an pek Nadal hi hard leh grass court-ah duhthusama ṭha a ni lo deuh nia sawi a awm ṭhin. Amaherawhchu, Nadal hian Wimbledon nomawi pahnih a chawi tawh a, hei hi player langsar tam zawkin an tih theih loh thil a ni.

Federer a tlo

Swiss tlangval Federer hi kum 35 mi a ni tawh a, tournament zawng zawngah a inlan tawh lem lo. Tun season-ah Australian Open, Indian Wells leh Miami Open nomawi a chawi, heng inelnaah te hian tun hma lama a hneh hleih theih loh Nadal a hneh.

Clay court-ah a inlan zui lo a, hei hi grass court lama hlawhtlin a duh vang a ni. Stuttgart Open-ah rin loh takin German veteran Tommy Haas hneh loin a tla a, kar hmasa a khelh zawh tak Halle Open-ah erawh set hloh loin nomawi a chawi leh thei tawh.

Federer chuan, "Kum 15 chhunga a vawi khat nan grass court tournament-a ka match hmasa berah ka chak lo nghal a, ka ngui hman hle. Mahse, Halle lamah ka insiamṭha leh thei nghal, ṭha takin ka la inkhel thei a ni tih ka lantir avangin ka lawm. Result ṭha lo theihnghilhin a ṭha lam beisei hun a ni," a ti.

Wimbledon nomawi vawi sarih chawi tawh Federer hian kum 2004, 2005 leh 2012 te khan kum tir lama final a luh hmasak paliah hnehna a chang vek a, chumi hnuah Wimbledon title a la bawk - kuminah pawh Federer hian final vawi li khel tawhin hnehna a la chang vek.

The Championship

Khawvela tennis tournament upa ber 'The Championships, Wimbledon' hi a sawi awlsam nan Wimbledon tih niin kum 140 liam ta (1877) khan khelh ṭan a ni a, a tirah chuan mipa singles chiah khelh ṭhin niin khawtual tlangval Spencer Gore chu champion hmasa ber a ni. Kum 1884 aṭang khan hmeichhe singles leh mipa double telh niin inelna huang an zauh chho zel.

Mipa singles leh double hi 'best of five sets' hmanga chak zawk zawn ṭhin a ni a, a dang zawng chu 'best of three' a ni thung. Set tinah 6-6 a nih hnuin tiebreak game khelh a ni ṭhin. Mahse, set ngana emaw set thumnaah emaw a chak zawk tur a chianna tur a nih chuan game hnih la hmasa zawk chhiar ṭhin a ni.

Thil dang

Wimbledon hi tun hnaiah chuan court hrang hrang 17, phaitualhnim chi khat 'perennial ryegrass' phahah khelh ṭhin a ni a, Centre Court leh Number 1 Court te chu player langsar leh inkhelh hlu bik khelhna hmun a ni. Inelna hi fur laia neih ṭhin a nih vangin ruah surin a tibuai fo, ruah avnga harsatna sut kian nan a khelhna hmunpui ber Centre Court chu kum 2009 aṭang khan a chung khuhna siam a ni.

Grand Slam dangte ang lo takin Wim­bledon-ah hi chuan incheina thlengin an duh fir hle. Thawmhnaw rawng chi khat hak chu an chindan ṭhan a ni a, player zawng zawngin a var an ha ṭhin - chair umpire, linesmen, ball boys leh ball girl-te pawhin incheina angkhat an hmang ve ṭhin bawk.

Centre Court-ah hian kum 1922 aṭang khan 'Royal Box' an siam ṭan, seat 74 awmin British lal chhungkua leh mi pawimawh bakah sawm bikte ṭhutna hmun a ni. Sorkar mi pawimawh, tennis khawvela mi hming-ṭha, tournament sumdawnna lama thawhpui, British sipai, thuthar thehdarhtu hruaitu lian te bakah British tennis hmasawn theih nana thawhhlawk te an ni tlangpui.

Royal box hmuna ṭhu tur hi Champion­ships’ Organising Committee, The Lawn Tennis Association thurawn angin All England Club chairman chuan a sawm ṭhin. Helai hmuna ṭhu tur chuan incheina thlengin uluk a ngai a, organiser lamin an ei leh in tur an lo buatsaih sak ṭhin bawk.