Kolkata club bazar-na hmun Aizawl FC Kamo-a'n Mohun Bagan a pan
I League-a Aizawl FC champion puitu Kamo Stephane Bayi-a'n Mohun Bagan a pan. Indian football dinhmun chiang lo karah East Bengal leh Mohun Bagan-in 'bazar' an ṭhulh chuang lo a, tun dinhmunah chuan 'Aizawl FC' chu an bazar-na hmun a ni!
East Bengal hian Aizawl FC coach Khalid Jamil chu I League-a Indian coach awm tawh zinga hlawh hnem ber ni turin season hnih chhung atan vaibelchhe 1.25-in contract an ziahpui a, Jamil-a naute zingah Lalramchullova, Brandon VL Remdika leh Mahmoud Al Amna an lalut tawh bawk.
Mohun Bagan-in an hmelma kumhlun tihdan thikin Aizawl FC lam bawk an hawi a, Ivorian striker Kamo an lakluh hma hian Nigerian defender Eze Kingsley Obumneme chu Mizo club aṭang hian an lo lalut tawh.
Kamo a liam
Season hmasa I League ṭan dawnah Aizawl FC-in Indian football a hmelhriat la hlawh lo Kamo Stephane Bayi an lalut a, kum 21-a upa striker hi kum lamah a la nau avangin tawnhriat a la nei tam lo a, Aizawl FC-in an lakluh hian eng ang taka 'ṭha' nge a nih Mizo club ṭantuten an la hre lo.
Ivorian striker hian I League match hmasa pasarihah goal a khung miah lo a, 'Tu nge Kamo?' tihah Mizo club ṭantute an la chiang lo. February 10-ah Aizawl FC-in Churchill Brothers an mikhual a, he inkhel hi 'Kamo tak tak' kan hriat ṭanna a ni. Ivorian striker hian I League-a a goal hmasa ber chu Goan club lakah hian a khung a, a hawikir tawh lo.
Kamo hian Mumbai FC (2), Minerva Punjab (1) leh Churchill Brothers (2) lakah goal a khung chhunzawm a, I League-a Aizawl FC an champion meuh chuan Mizo club tan goal ruk a khung a, tunah chuan Mohun Bagan a pan ta. Ivorian striker hi official chuan goal sarih khung anga pawm a ni a, hei hi East Bengal nen an match hmasa bera Gurwinder Singh own goal kha I League lamin Kamo khung anga an record vang a ni.
Duffy aiah Kamo
Mohun Bagan-in season liam taa an foreign player zingah Sony Norde lo chu chelh an tum loh thu an sawi chiang tawh a, Japanese midfielder Katsumi Yusa, Brazilian defender Eduardo Ferreira leh Scottish striker Darryl Duffy-te chu Mariners kawr hain kan hmu tawh dawn lo tihna a ni.
Bagan hian centre back Eduardo hmunruak luah turin Eze Kingsley an lalut tawh a, captain Katsumi Yusa hmunruaka awm turin Kamo rual hian Churchill Brothers aṭangin Ansumana Kromah an lalut a, Kamo-a'n Swansea City striker hlui Duffy hmunruak a luah dawn - a awlsam lo ang.
Kolkata club hi an coach Sanjoy Sen nen an inṭhen dawn nia sawi thawm awm hman mah se Bengali boss hian season tharah pawh Bagan hi a la enkawl chhunzawm zel dawn a, July thla tawp aṭanga khelh ṭan tur Calcutta Football League-ah hian assistant manager Shankarlal Chakraborty chuan a enkawl thung dawn.
A awlsam lo
Kamo-a'n India rama league sang berah season khat a khel ve hman chauh tih hnuah club lian Mohun Bagan a zawm nghal thei a, hlawhtlinna ropui tak a ni. Ivorian striker hi player class sang tak ni lo mah se khelmualah theihtawp chhuaha khel ṭhin mi a ni a, hei vang tak hian Aizawl FC coach kal chhuak ta Khalid Jamil pawh khan a duhsak hle.
Ivorian striker-in mipui beisei phak loa goal a khung theih loh lai pawhin Jamil chuan he striker hi a ring lui tlat a, "Ka player-ten an theihtawp an chhuah hian ka lawm a, a bak ka beisei lo," tih chu Indian coach-in a player a ṭan ṭhinna thu a ni. Season chawhnu lamah Jamil-a'n Kamo a rin chhan a lang ṭan a, tunah chuan Bagan player a ni ta.
Mahse, Aizawl FC striker hlui tan hna a awlsam dawn lo. Indian football-ah transfer bazar inhawn hun bik a awm lo a, season tluanin club-in player duhzawng an lalut thei. CFL-a George Telegraph tana lo khel tawh leh Goa Pro League lama Salgaocar kawr lo ha tawhtu Kamo hian CFL-ah beisei a phak lo a nih chuan I League-ah Bagan kawr a ha tawh kher lo ang.