Serena-i'n McEnroe a chhang

Serena Williams chuan tun hnaia amah sawiseltu John McEnroe chu a mimal zalenna zahsak turin a ngen a, nau nei tur dinhmuna a din mek thu a sawi lang tel bawk.

American star Serena hian Grand Slam nomawi 23 zet a chawi tawh a, Open Era chinah chuan mipa leh hmeichhe huangah ani aia major title la hnem an awm lo. Mipa singles-a champion hnem ber Roger Federer chuan nomawi 18 a nei thung.

Grand Slam vawi sarih champion tawh McEnroe chuan Serena hi player ṭha chungchuang bik nia a hriat loh thu a sawi a, a thil tih ang chu hmeichhe player dang pawhin an vannei a nih chuan an tih ve theih tur thu sawi bawkin, "Mipa huangah khel sela chuan world number 700-na a ni ang," ti hialin hmeichhe number 1 chu na takin a sawisel.

Kum 35 mi Serena chuan, "John ka zah lutuk che, mahse ka mimal zalenna leh nunphung hi chu min zah sak ve la ka duh. Tunah hian nau nei turin ka inbuatsaih mek a sin," tiin social media lamah a tarlang.

Mipa leh hmeichhe tennis chungchangah hian inhnialna tam tak a lo awm tawh ṭhin. Inelna ngaihhlut Grand Slam-ah hian mipa leh hmeichhe champion lawmman dawn zat a inang a, he thil hi Novak Djokovic pawhin mak a tih thu a sawi chhuak tawh.

Serbian tlangval Djokovic hian, "Mipa chuan set nga kan khel a, hmeichia chuan set thum. Mipuiin tunge an enduh zawk a, tunge entu ngah zawk tih pawh kan chhut a ṭul," tiin tun hma deuh khan a lo sawi ve tawh bawk a ni.