Commonwealth Games 2022 a ṭiak ; Mizo telna India an che ṭha!

British ram awpna hnuai awm tawhte inelna Commonwealth Games 2022 chu Thawhṭanni zan khan Birmingham, England-ah a ṭiak ta. India chuan a pumpuiah medal 61 an hlawh chhuak - medal an lak tam ber ṭum ni lo mah se, an chet ṭhat ber ṭum tia sawi theih a ni.

Medal 178 teh meuh latu Australia chu chiang takin an champion leh a, anni hi chu khawvel huap pawhin a ṭha ber zinga mi an ni. A thlengtu England chuan medal 176 lain pahnihna an ni, an hnungah Canada leh India te an awm.

Commonwealth Games 2022-ah hian India tan Mizo pawhin an thawhhlawk hle. Jeremy Lalrinnunga'n weightlifting 67kg huangah gold medal a chawi chhuak. Lalremsiami Hmar telna hmeichhe hockey team chuan silver medal an la bawk.

India an che fuh
Medal lak hnem lamah chuan India hian 2018 Commonwealth Games-ah khan medal 66 an lo la tawh, tun ṭum ai hian an la hnem zawk. 2010 khan Delhi khawpui chuan CWG hi a thleng a, hemi ṭum hian medal 101 zet an la bawk a ni.

Tun ṭuma an che ṭha tia sawi theih a nih chhan chu inelna peng hrang a tlem vang a ni. Gold Coast 2018-ah khan medal 66 an lak zinga 16 chu shooting huangah a ni, tun ṭumah hian India medal lak hnem berna ṭhin shooting inelna buatsaih a ni ve lo.

Delhi khawpuiin a thlen ṭum pawh khan, shooting aṭang hian medal 30 zet an hlawh chhuak a, 2010-a medal lak hnemna dang Archery (8 medal), Greco-Roman Wrestling (7) leh tennis (4) te pawh kuminah an telh lo vek.

Birmingham 2022-ah hian India hi infiamna peng 16-ah an inlan a, infiammi 210 thawk chhuakin medal 61 an la hi a chhe lo. Medal lak zat leh infiamna huanga an telna chhut chuan, inelna an hmachhawn ṭhat ber ṭum tiin a sawi theih.

Medal pali latu Kamal
July thla khan Sharath Kamal hian kum 40 a tling tawh, infiamna khawvelah chuan a vanglai a pel tawh. Mahse, Tamil Nadu table tennis star hi a la chuai lo - tun Commonwealth Games neih zawk takah khan India tan medal pali ngawt a hlawh chhuak!

Table Tennis huangah - men's singles, mixed doubles leh men's team-ah te gold medal a la a, heng bakah hian men's doubles huangah silver medal an hlawh chhuak bawk. Commonwelth Games hrim hrimah medal 13 teh meuh a vaw chhuak tawh a ni.

Olympic 2008 an neih ṭuma TT huanga India aiawhtu Neha Aggarwal Sharma chuan, "Sharath hi India table tennis player ṭha ber a ni chiang hle, ani ang hi chu an piang leh tawh mai mai lo ang, a bula awm hnai apiangin a ṭhatzia an hrechiang," tiin a sawi.

Thawhṭanni zana Commonwelth Games khelhna hunah khan Sharath hi India hnam puanzar kengtu (flag bearer) a ni. Hawnna hunah erawh khan chuan PV Sindhu leh mipa hockey team captain Manpreet Singh ten an keng thung.

Wrestling a hlu
India hian infiamna peng hrang hrang 12 - wrestling, table tennis, weightlifting, boxing, badminton, athletics, lawn bowls, para powerlifting, judo, hockey, cricket leh squash-ah te medal an la a ni.

Wrestling huangah bik gold medal paruk lak niin, silver medal pakhat leh bronze medal pathum, a vaiin medal 12 zet an hlawh chhuak. Infiamna peng malah chuan wrestling hi India medal lak hnem berna a ni hial.

Inchai tih lohah chuan medal lakah table tennis chu India hlawhtlinna lian a ni bawk. TT huangah hian gold medal pali bakah silver pakhat leh bronze medal pahnih an la bawk a, a pumpuia an thlen san theih chhan a ni.

Weightlifter ten medal 10 an chawi chhuak bawk. TT aiin weightlifting huangah hian medal chu an la hnem, mahse a pawimawh ber gold medal chu weightlifter ten pathum an chawi chhuak a, hei hi TT player-te gold medal lak aiin a tlem thung a ni.

Mizoram hming a mawi
Commonwealth Games hi mi fate inlanna tur, mi ram leh state dangte telna tur niin kan ngai a, cho loh enin kan en ṭhin a ni ber mai. Mahse, tumna leh huaisenna a awm miau chuan Mizo infiammite pawhin kan tlin ve a ni tih a takin kan hmu chho zel.

Mizo infiammi zingah boxer Zoramthanga, weightlifter Lalchhanhimi leh Jeremy Lalrinnunga bakah, hockey player Lalremsiami Hmar te chu Commonwealth Games khel an ni. Tunah chuan an khel a ni satliah lo a, gold medal leh bronze medal hial an hlawh chhuak.

Mizo tlangval Jeremy-a hi Thawhṭanni khan Mizoramah a rawn haw a, mahse a hnathawhna Indian Army lamin lawmpuina hun an hman dawn avangin nimin khan Aizawl chhuahsanin Delhi a pan lehnghal. August 12, Zirtawpni hian prime minister Narendra Modi hoin Indian Contingent chuan an hlawhtlinna lawmna hun an hmang dawn, he hunah hian hockey player Remsiami te pawh an tel hman tawh ang.

Mizoram sorkar chuan Jeremy-a leh Remsiami te hlawhtlinna hi a hranpa a lawmsak a tum a, a hun tur tak erawh tihchian a la ni lo thung. PM-in lawmpuina hun a hman zawh hi chuan Mizoram lamah an rawn haw theih a beiseiawm.

Commonwealth Games 1990-ah Mizo boxer Zoramthanga chu Auckland, New Zealand-ah India aiawhin a lo feh chhuak daih tawh a, medal erawh a la lo. A hnung zui thei an awm mai lo, kum 2018 khan Gold Coast, Australia-ah Chhani leh Remsiami ten a hnung hi an zui leh chiah.

Commonwealth Games 2018-ah hian Khawzawl nula Chhani hi 90kg huangah a inlan a, a sang zual pariat zingah tel phak mah se medal erawh a hlawh chhuak zo lo. Remsiami telna hockey team pawhin medal an la phak lo a ni.

A zawnin Remsiami hian Commonwealth Games a khel tihna a ni, a hmasa zawkah hlawhtling nghal lo mah se kuminah erawh bronze medal an hlawh chhuak. Kolasib nula hian Tokyo Olympic pawh a khel tawh bawk.
Mizo infiammi zingah Lalremsanga chuan Olympic vawi hnih; Barcelona 1992 leh Atlanta 1996 te kha a lo khel tawh a, Commonwealth Championship chu khel mah se, Commonwealth Games tak erawh a khel lo thung.

"Pathian leh min ṭawngṭaipuina zar a ni. Englai pawha ka tan a awm reng ṭhin ka chhungte, min ṭawngṭaipuitu te, min duhsaktute leh englai pawha min ṭawiawm reng ṭhin tute - Mizo mipui zawng zawng chungah ka lawm e." - Lalremsiami Hmar