Kum khat hnuah Serena a chak

Serena Williams chuan thla 14 zet hnuah singles match bikah hnehna a chang ve leh ta. American star hian Thawhṭan zan khan National Bank Open-ah Nuria Parrizas Diaz chu 6-3, 6-4 in a hneh.

Kum 40 mi Serena hian hliam leh harsatna dang vangin tournament a khel tam thei ta lo, a inlan chhunah pawh beisei a phak lo ṭhin. US Open khel tura a inbuatsaihnaah erawh result ṭha a nei ta.

A match lehpekah chuan Olympic gold medalist Belinda Bencic leh Tereza Martincova te inkhela chak zawk a hmachhawn ang, a tu zawk zawk pawh hi tlang se Serena tan hna awlsam a ni dawn lo.

Grand Slam vawi 23 champion tawh Serena chuan, "A tawp a tawpah chuan ka nghak chhuak ve leh ta, tennis hi chu ka hmangaih in khelh nuam ka ti em em a, theih ni se chuan tawp chin nei loa khelh mai ka duh.

"A chang chuan kan duh leh beisei anga a thlen theih loh chang a awm, amaherawhchu beidawng loa kan nghak ngar ngar a nih chuan a tawpah lawmna tur a lo thleng ve leh mai ṭhin," tiin a sawi.

US Open inbuatsaihna tournament-ah hian, Wim-bledon champion Elena Rybakina leh world number 1 hlui Simona Halep te pawhin an khingpui ve ve hnehin round sang zawk an inhlangkai ve bawk.