Group B hmahruaitu Chhinga Veng

Chhinga Vengin I Day Football match hmasa berah Mizoram Police hneh lo mah se match hnuhnung pahnihah Chhingcows hian Chanmari leh Electric Veng FC hnehin group B hmahruaitu an ni.

Coach Anand Gurung leh manager Lalremruata hote hian semifinal-ah Aizawl FC an hmachhawn dawn a, August 11 tlai dar 2:00-ah final khel tur an zawng ang.

Nimin inkhelah hian Chhingcows tan semifinal lut turin draw a tawk a, Electric Veng tan chak a ngai thung. Chhinga Veng hi inkhelah an chungnung zawk a, chak an phu.

Chhingcows hi an vanneih ṭum ni se box chhunga Shalom-a an tihtluk chu penalty ngei turah a ngaih theih a, second half-ah EFC defender C Lalnunmawia'n referee zahngaina dawngin red card a pumpelh bawk.

Chhinga Veng hian referee lakah an beisei ang thutlukna hmu lo mah se point thum erawh an hlawh chhuak tho a, Serchhip tlangval Lalrinzuala'n goal khung thei bik player a nihzia a pholang.

Rinzuala hi Santosh Trophy hnuhnung berah Mizoram striker niin Inter Village 2022 champion Champhai Kanan laka goal nga a khung avangin hriat a hlawh. Tun ṭum I Day Football-ah Rinzuala hian Chanmari lakah goal hnih a khung tawh a, Electric Veng lakah hian angle zim tak aṭangin goal ṭha tak a khung leh bawk - MPL-ah a hmuhnawm dawn.