Chanmari aiin Police an huaisen zawk

Mizoram Police chuan I Day Football semifinal lut turin Chanmari FC lakah 'comeback ropui' an lantir. Hun harsaah Police-in an zia an chhuah a, thi tawh kha an tho leh!

Lalbiaksanga Colney kaihhruai Police hi group B-ah pahnihna an ni a, August 11-a khelh tur semifinal-ah group A pakhatna FC Venghnuai an hmachhawn ang.

Nimin Lammual inkhelah Malsawmfela hmangin Police-in goal khung hmasa mah se Chanmari FC-in goal thumin an chhanglet.

Police hian 3-1 a nih hnuah beiseina nei turin Sawmfela hmang bawkin si phurh an sut ṭhen a, Chanmariin Lalremruata hmanga goal lina an khung avangin hmabak a la harsa tho.

Chanmari hian minute 14 chiah a awm tawh tihin 4-2 in hma hruai a, semifinal lut ngei tura ngaih ni hman mah se Police-in Ronald Zothanzama leh Zaithanmawia te hmangin si phurh an sut zo.

Chanmari hun
Police leh Chanmari inkhelah hian goal riat a lut a, penalty vawi hnih hlah a awm bawk. Sawmfela'n minute rukna lekah goal hmahruai a khung a, Lalbiakhlua'n (Hlutea) penalty aṭanga khung belh theihna remchang a neih chu Chanmari keeper Lalhruaitluanga'n a dansak.

Chanmariin Lalnun-tluanga hmangin minute 39-naah si phurh an sut a, penalty hmangin hmahruai theihna remchang an neih chu Lalramchullova'n goal-ah a chantir thei lo - Police keeper F. Lalmuanawma'n a dansak.

Second half ṭan aṭanga minute thumna lekah Tluangtea'n a khung belh a, minute 63-naah captain Malsawmzuala'n box pawn chiah aṭangin mawi zetin a volley goal. Chanmari hi 3-1 a hma an hruai avangin an dinhmun a ṭha hle.

Sawmfela show
Mizo striker 'class sang' an sawi apianga sawi hmaih theih loh Sawmfela'n goal hmahruai duh tawk loin mawi zetin goal hnihna a volley goal. Sawmfela'n Police beiseina siam mah se Ramhlun South tlangval Lalremruata'n Chanmari goal lina a khung.

Chanmari lam chak turah an inngai tawh a, tawnhriat nei ṭha Police erawh an la tlawm lo - minute 78-naah Sawmfela bawk a rawn inlar a, corner aṭanga ball kal chu tauh fuhin hemi per hi Ronald-a'n goal-ah a chantir.

Coach BS-a'n vanneihna beiseiin Zaithanmawia a rawn luhtir a, a beiseina a hlawhtling zui. Zaia hian minute 86-naah goal pawimawh a tauh lut a, Chanmari laka siphurh sutna goal hi semifinal luh nan a tawk.