Nadal a inkhel thei rih lo

Rafael Nadal chuan training zawm tawh mah se, tun kara khelh mek Canadian Open aṭangin a inhnukdawk. Spanish star hi a dul hliam vangin Wimbledon semifinal aṭangin a lo inhnukdawk tawh bawk.

World number 3 Nadal hian season tir lamah Australian Open leh French Open nomawi a chawi, season khat chhunga Grand Slam pali kawl khawm vek thei nih theihna remchang a nei hman.

Mahse, Wimbledon semifinal lut chungin a khel thei lo a, a hnu lamah pawh tournament a la hmachhawn thei rih lo a ni. Tun thla tawp lama khelh tur US Open atan duhthusama ṭhain inbuatsaihna a nei thei dawn lo.

Grand Slam vawi 22 champion tawh Nadal chuan, "Ni li liam ta vel aṭang khan training chu ka nei tawh, mahse service leh thil dang ṭhenkhatah harsatna ka la nei. Ka doctor nen ngun taka kan ngaihtuah hnuah chawlh rih a ṭha kan ti," tiin a sawi.

Nadal a inkhelh theih loh lai hian Daniil Medvedev erawh a inkhel thei. Russian tlangval hian kar hmasa khan Los Cabos Open nomawi a chawi a, tun kara ranking chhuak tharah pawh a chung ber dinhmun a luah chhunzawm.

Russia leh Ukraine buaina vangin Medvedev hian Wimbledon kha a khel thei lo. Grass court inelna lian ber khel thei lo mah se hard court-ah ṭha takin a lo kir leh tawh a, ranking sang tak ni chungin Canadian Open leh US Open a hmachhawn thei dawn.