Kian zai rel thei lo Barca buaina!
European football-a club leiba ngah ber pawl ni chungin transfer bazar-ah Barcelona an insum lo a, an mit châk zawng apiang an lalut a, player lahin sawmtu dang tam tak sawmna hnarin, Catalan club 'jersey' meuh chu hak an lo châk zel si.
Barcelona hian hming langsar tak tak Robert Lewandowski, Raphinha, Jules Kounde, Andreas Christensen, Franck Kessie leh Pablo Torre lakluh nan euro maktaduai 160 dawn an seng tawh a, Ousmane Dembele leh Sergi Roberto te chu contract thar an ziahpui bawk.
Mahse, Barca hian television rights leh Barca Studios-a share an hralh ṭhen avanga sum nei nia an insawi chungin, an thusawiah La Liga thuneituten a pawp lai an hmu fuh a, he thu buatsaih a nih lai hian Catalan club hian an player tharte an la ziak lut thei lo.
Sum hmuhna
Barca president Joan Laporta-a'n an sum hmuhna a sawifiah a, 'economic kawihsapir' ni loin 'economic levers' an tih chu Catalan club hian tun hnaiah vawi thum ngawt an hmang tawh a, hei hian duh ang taka club share ṭhenkhat hralh turin zalenna a pe.
Catalan club hian La Liga TV rights chu US company Sixth Street hnenah an hralh ṭhen a, an vawi khat hralhnaah hian 10% share chu kum 25 chhung atan an hralh a, a hnuah 15% dang chu kum 25 atan bawk an hralh leh a, Barca-in an tarlan dan chuan TV share hralh aṭanga an sum hmuh chu €667mtd a ni.
Mahse, La Liga-in an bihchiana lo lang chu Sixth Street hian Barca hnenah hian €517mtd bak an pe rih lo a, pawisa bo anga lang €150mtd chu Barca sum neih sa niin, Catalan club hian Sixth Street aṭanga sum hmuh tel angin an tarlang a, La Liga bum an tum.
A buai zual
Barca lamin he thu buatsaih lai hian ṭawngkam an la nei lo. Mahse, Barca TV rights hralhnaa inrawlh ṭhenkhat sawi danin, Catalan club hian €150mtd hi an sum an hmang lo - an TV share an hralh avanga a hlutna awm zel tur an chhut tel a ngai a, hei hi Barca leh club auditor-te chuan €150mtd a hluah an chhut mai niin a lang a, hei hi Spain rama tih dan niin Spanish GAAP (generally accepted accounting principles) tih a ni.
Barcelona hian Sixth Street hnena television rights an hralh bakah hian, Barca Studios-a share 24.5% chu Socios.com hnenah an hralh bawk a, Spanish GAAP thlenga sawi rik ni mah se La Liga ngaihdan chuan Barca-in player thar an lakte ziah luh an duh chuan Barca Studios-a 24.5 % share dang an hralh leh a la ngai!
Barca-in Barca Studios-a 24.5% share hi €100 mtd velin an hralh nia sawi a ni a, 24.5% dang an hralh leh chuan Barca Studios aṭang ringawtin €200 mtd chu an nei dawn tihna a ni a, euro maktaduai 800 chuang an nei dawn tihna a ni ang.
Hralh a ngai
Barca hian share hralh belh zel an inzuam lo a nih chuan tlanchhuah theihna dan dang an la nei - player hralhna hmanga sum hmuh belh chu thil langsar a ni a, a nih loh chuan an sum lakluh leh hman ral a inbuk tawk theih nan player ṭhenkhat hlawh tihhniam a ni.
Catalan club tan chuan player hralhna aṭanga sum hmuh bawk a, an chhuah avanga an hlawha an sen ral tur hum bawk hi kawng ṭha ber ni rihin a lang - mahse, tunah hian chhuak tura an duhte an chhuak duh lo!
Catalan club hian Gerard Pique leh Sergio Busquets chu hlawh tihniam turin an dawr mek niin khawthlang media-te chuan an tarlang a, hetihlai hian Martin Braithwaite leh Samuel Umtiti te chu chhuak turin an ti bawk.
De Jong hi
Barcelona hian nipuiah Philippe Coutinho, Riqui Puig, Neto, Dani Alves, Ferran Jutglà, Rey Manaj, Moussa Wagué leh Óscar Mingueza te chu an chhuahtir tawh a, transfer aṭanga an sum hmuh erawh a tam lo. Chutihrual chuan hlawha an sen ral tur an hum ringawt pawh hi a hlu tham ang.
Hetihlaia Barca buaina pakhat chu Frenkie de Jong a ni a, man to taka hralh theih player manah hian Manchester United nen inrem mah se Dutch midfielder hi a chhuak duh lo a, Chelsea chuan an ngaihven mek bawk.
Hetiang boruak karah hian Laporta chuan De Jong-a'n an hnena cham a duh thu a sawi a, hetihlai hian sports journalist lar David Ornstein chuan Barca hian De Jong chu a chunga dan anga hmalakah an vau niin a sawi!
Engtin a?
Mahni player-te vau khut khut club hi hriat tur an la tam lo hle - mahse, club lian anga chet duh si, sum nei bawk si lo, an duh lote hnawt chhuak thei bawk si lo Barca an buai a, De Jong an vau mai pawh hi "an tih awm tawk" tih mai awlsam tak a ni.
Barcelona hian January 2019 khan De Jong hi lalut turin inremna an neihpui a, July, 2019-ah a zawm - kum nga chhung atan contract a ziak. October 20, 2020 khan contract thar a ziak a, kum hnih atan a contract hi a pawtsei a, kum 2026 thleng a daih.
De Jong-a contract thar ziah chhan hi Covid-19 vanga sum lama club talbuai vang a ni pakhat. An inrem angin De Jong hian 2020-21 leh 2021-22 season-ah khan a hlawh a tihniam a, mahse, heta a hlawh an tihhniamna €18mtd chu tun season aṭanga ṭanin, season li chhunga pek tlak tur a ni.
Buaina chu
De Jong hian Europa League khelh duh loh avangin Manchester United pan a châk lo sa hrim hrim a, chumi piahlamah chuan Barca hian a hlawh an bat zat hi an pek phawt loh chuan club dang pawh zawm a tum chuang lo.
Barca lahin sum tuak nan, man to taka an midfielder hi hralh an duh si a, an talbuai ta a ni ber - Barca hian July 15 khan De Jong hi lehkha an thawn tawh a, board hmasain contract an lo ziahpuiah chuan thil dik lo a awm thu an hrilh a, an duh chuan dan anga hmalak an theih thu an hrilh!
Chutihrual chuan Barca hian De Jong chu Nou Camp-ah a cham dawn a nih chuan, October, 2020-a a contract ang ni lo, January, 2019-a a ziah anga kal turin an thlem zui a, an duh ber erawh a chhuah niin a lang.
Chhantu a nei
Barcelona hi De Jong chungchangah pawr viau mah se Dutch midfielder hian chhantu a nei ve tho a, Barcelona board chhuak tate chuan De Jong contract an ziahpui kha dan ang thlapa engkim kalpui a nih thu leh, La Liga-in an pawm thlap thu an sawi.
Hei chauh a ni lo - khawvel huap professional footballer intelkhawm pawl FIFPro chuan Barca hmalak dan hi an thlithlai reng bawk a, Barca hian uchuak taka De Jong hi an nawr a nih ngat chuan an che fuh lo ang.
Dutch Players' Union chairman Yevhen Levchenko chuan na takin Barcelona president Joan Laporta a lo sawisel tawh bawk a, De Jong chhehvel ringawt hi Catalan club tan luhaina tham a ni.
A la buai
Barcelona hian August 13, Inrinni zan dar 12:30-ah Rayo Vallecano mikhualin season thar atana an league match hmasa ber an khel dawn a, player tharte lang miah loa inkhelhna chance a sang hle.
Spanish radio station COPE puan dan phei chuan Sixth Street nena an indawr dan avangin Barca hian chhiah €37.5mtd an chawi belh dawn a, mahse, hei erawh thudik tawk lo a nih thu Barca lamhnai pakhat chuan a sawi.
Barca hian leiba nei chunga player an lakluh nasat avangin inpaih thawl erawh an mamawh tih chiang takin a lang a, tun ang renga inrelbawlna a fel lo a nih chuan season tharah pawh club thil hlu hralh dan tur bawk an ngaihtuah leh a ṭul ang.