Chelsea-in Mendy chelh an tum

Club neitu thar hnuaia indinthar mek Chelsea chuan goalkeeper Edouard Mendy chu contract thar ziahpui an tum a, inbiakna an nei ṭan.

Kum 30 mi keeper hian kum 2020 khan Chelsea hi Rennes aṭangin a zawm a, pound maktaduai 20 man keeper hian khawvela keeper man to ber Kepa Arrizabalaga (£71.6mtd) chu luahlanin first choice keeper a ni nghal thei a ni.

Senegal international hian Stamford Bridge-ah kum thum cham turin contract a la nei a, mahse, Chelsea first team player zinga hlawh tlem pawl a nih avangin hlawh san a duh a, Chelsea tan khelh chhunzawm duh mah se a hlawh hi an san viau a nih loh chuan chhuah a hreh lo ang.

Mendy hi Chelsea-in 2020-21 season-a Champions League nomawi an chawi nana player pawimawh a ni a, match kuaah ngawt goal chhuah loin CL record ding lai chu clean sheet neih ngah lamah a nih rual.

Kum 2021 khan UEFA Goal-keeper of the Year leh The Best FIFA Goalkeeper-ah a thlan a ni a, African keeper zinga he chawimawina pahnih dawng thei hmasa ber a ni.

London club tan hian UEFA Super Cup leh FIFA Club World Cup nomawi a chawi tawh bawk a, kumin kumtir khan Africa Cup of Nations-ah Senegal chu champion puiin best goalkeeper-ah thlan a ni bawk.

Senegal tana vawi 25 ngawt si ban nghak tawh keeper hian Chelsea tan match 94 a khel tawh a, contract thar hi ziah thuai a duh niin khawthlang media-te chuan an tarlang.