Everton-in Onana leh Coady an lalut

Premier League club Everton chuan England centre back Conor Coady chu season khat chhung an hnena loan-a khel turin an lalut a, Liverpool academy chhuak duhthlanna hian Reds fans tam tak a barakhaih ang. Toffees hian nimin tlai khan Lille aṭangin pound maktaduai 33-in midfielder Amadou Onana an lakluh thu an puang bawk.

Kum 29 mi Coady hi Wolverhampton Wanderers captain a ni a, mahse, coach Bruno Lage-a'n an league match hmasa bera Leeds United an hmachhawn ṭum pawhin Max Kilman leh Nathan Collins a ring zawk.

Coady hian kum tawpah World Cup khelh phak a duh bawk si a, England tana vawi 10 inlan tawh defender hian a khelh phakna tur hmuna a ngaih Everton a pan phah ta a ni.

Liverpool tana vawi hnih inlan ve hman defender chuan, "Everton-in min duh tih ka hriat khan he club zawm hi ka duh nghal a, he club ka zawm thei hi ka hlim takzet. Ka tan chuan vawiin hi ni pawimawh leh hlimawm tak a ni," a ti.

Coady zawha an lakluh Onana hi Everton-in tun nipuia player panga an lakna a ni a, anni pahnih hma hian centre back James Tarkowski, forward Dwight McNeil leh defender Ruben Vinagre an lalut tawh bawk a, tun season atan an inpuahchah nasa hle.

Kum 20 mi Onana chuan, "Everton ka zawm thei hi ropui ka ti. Club lian tak a ni tih ka hria a, England-a club lian ber zinga mi a ni. He club-a mite hian min duh tih an lantir a, ka tana hmun min siamsak hi ka lawm," tiin a sawi.

Onana hian season liam ta khan Lille tan match 31 khelin goal khat a khung a, June 3 khan Netherlands an hmachhawn ṭumin Belgium tan a vawi khat nan a inlan bawk.