Leeds-in keeper Robles an la

Premier League club Leeds United chuan Real Betis goalkeeper Joel Robles chu free transfer-in an lalut a, Elland Road-ah season khat chhung khel turin contract a ziak.

Kum 32 mi keeper hian Everton leh Wigan Athletic tan pawh a lo khelh tawh avangin English football-ah a mikhual lo a, first choice Illan Meslier leh Kristoffer Klaesson te nen Leeds tana si ban nghak turin an inel ang.

Atletico Madrid academy aṭanga inzir chhuak keeper hian 2012-13 season kha Wigan Athletic-ah loan-in a khel a, FA Cup nomawi a chawipui - final-a Manchester City an hnehna inkhelah a inlan a ni.

Wigan-a Robles enkawltu Roberto Martinez chuan Everton a enkawl khan a keeper hlui hi Merseyside club-ah a hruai lut zui a, Everton tan match 65 khel zuiin kum 2018 khan Real Betis a pan.

Betis-ah hian match 78 a khel a, season hmasa khan Copa del Rey-ah champion nomawi chawi mah se, inelna hrang hrangah match thum chiah a khel ve a ni.