FA Cup semifinal kan nghak chhuak ta Arsenal Vs Man City; Man Utd Vs Chelsea

Kumin hi FA Cup semifinal en châkawm ber ṭum a ni hial ang. Club lian pali Arsenal, Manchester City, Manchester United leh Chelsea te an la dam a, tute pawh hi champion atana itawm tak vek an ni.

Zanin dar 12:15-ah champion lai Manchester City leh champion ngun ber Arsenal te an inkhel ang a; July 19, Pathianni zan dar 10:30-ah Manchester United leh Chelsea te an inkhel ang. Semifinal hi Wembley Stadium-ah khelh a ni dawn.

Premier League table thlir chuan Manchester United chungah Chelsea an awm. Amaherawhchu Ole Gunnar Solskjaer hote hian tun season-ah Frank Lampard-a hote hi vawi thum ngawt an hneh tawh.

Tun season Premier League ṭanna inkhelah Manchester United-in 4-0 ngawtin Chelsea an sawp a, Marcus Rashford-a'n goal hnih a khung bakah Anthony Martial leh Daniel James ten goal khat ve ve a an khung.

Nikum October 30 khan Stamford Bridge-ah Blues-in United an mikhual a, Rashford-a goal hnih hmangin mikhual team hi 2-1 in an chak. An vawi hnih inhmachhawnna hi League Cup a ni a, team pahnih hi an ṭhat dan berin an inlan lo.

February 17 khan Stamford Bridge-ah an inhmachhawn leh a, Martial leh Harry Maguire te goal hmangin Man United an chak nawn. Hei chauh hi a ni lo, season liam ta khan FA Cup-ah inhmachhawnin United-in Paul Pogba leh Ander Herrera te goal hmangin Stamford Bridge-ah hnehna an chang.

Tun season-a vawi thum an intawnnaah Manchester United chak vek mah se Solskjaer hote hian Wembley Stadium-ah an chak tawhna hi an chhawm thei dawn lo. Chelsea dinhmun ṭhatna chhan tak erawh Frank Lampard-a hoten Thawhlehni zan khan Norwich City 1-0 in an hneh a, Manchester United-in Ningani zan khan Crystal Palace 2-0 in an hneh.

Blues-in United aiin darkar 48 in hahdamna hun an ngah zawk a, semifinal atan inpuahchahna hun ṭha an ngah zawk tihna a ni. Midfielder pawimawh N’Golo Kante pawh a dam ṭan a, squad-ah a awm theih a beiseiawm. Chelsea striker Olivier Giroud-a'n Norwich nen goal awmchhun a khung a, bul a ṭan leh mai a rinawm nachungin forward tlan chak Tammy Abraham pawh lut se defender Harry Maguire tan buaina tham a tling ang.

Chelsea hian semifinal lut turin Premier League champion thar Liverpool leh team ṭha zinga mi Leicester City te an hneh a, Manchester United laka zam tur an ni lo. Lampard-a hoten season tharah Champions League khelh ngei an tum a, Premier League-ah inkhel pawimawh pahnihin nghak mah se FA Cup nomawi lak tumin 'risk' an la ang.

Ole Gunnar Solskjaer chuan, "Keini aiin darkar 48-in hahdamna hun an ngah a, keini aiin chawlhna hun ṭha an ngah zawk. Fixture an siam dan hi a rual khai lo," tiin fixture siam danah a lungawi lo. Norwegian manager chuan sawi chhunzawmin, "Kan inpeih hman ang. Thil thleng tur ang chu a thleng tho dawn a, ka naute hian ngai an awh hman ka ring. Chumi piah lamah Wembley Stadium-a inkhel tur kan ni a, chu chuan phurna nasa tak min pek ngei ka ring," tiin FA Cup a ngaihhlut thu a sawi.

Solskjaer-a'n FA Cup-ah player chhawr ngun lo zawk te a hmang ṭhin a, tun ṭum erawh semifinal a nih tawh avangin a siksawi a nih pawhin player pahnih khat bak a nih rinawm loh. United hian FA Cup-ah goal 12 an khung tawh a, club top scorer erawh Odion Ighalo (goal thum) a ni daih a, Nigerian striker dawtah defender Harry Maguire (goal hnih) a awm leh bawk.