Germany hmaah Mexico

FIFA Confederations Cup semifinal-ah zanin dar 11:30 hian 2014 World Cup champion Germany-in Fisht Stadium, Sochi-ah Mexico an hmachhawn dawn a, Sony Six-ah inkhel hi a en theih ang.

Nizan khan Portugal leh Chile ten semifinal hmasa zawk an khel a, final hi July 2, Pathiannia khelh tur a ni.

Hneh loh tawng lo
Germany leh Mexico hian inelna neih mekah hneh loh an la tawng lo a, vawi hnih ve ve chakin vawi khat an inhnehtawk.

Joachim Low chuan, "A thiam pali zinga kan tel theih avangin ka naute ka chhuang hle. Team thar kan din a, khelhdan phung thar nen chuan semifinal thlen hi a chiang bik lo a ni," tiin semifinal pawh lawmna tham a nih thu a sawi.

Germany hi Group B hmahruai ni mah se Chile lakah point khat an hlawh chhuak hram a, an group aṭanga team ṭha bera chhal theih an ni lo. Chutihrualin Die Mannschaft hi naupang rual satliah an ni lo a, awmze neia talent nei ṭha rual leh tawnhriat nei ṭha rem khawm an nih avangin champion rinkai an ni phak.

Mexico hian coach Juan Carlos Osorio kaihhruaina hnuaiah midfield thunun nuam an ti a, mual laia Jonathan Dos Santos, Hector Herrera leh Andres Guardado te in­kawp hi European champion Portugal pawhin dan harsa an ti. Amaherawhchu zanin hian captain Guardado a inlan thei dawn lo a, hei hi Germany tan chuan thu lawmawm a ni.

No. 2 Ter Stegen
Germany goalkeeper-a number 1 chu Manuel Neuer a ni a, Bayern Munich goalkeeper el pha an awm lo. Die Mannschaft hian Neuer thlakna nghet an nei lo a, Confederations Cup match hmasa berah kum 25 mi Bernd Leno chu ven tir a ni a, hemi hma hian kum 27 mi Kevin Trapp chu Denmark nen friendly match an khelh ṭumin goal-ah dintir a ni a, World Cup qualifier-a San Marino an hmachhawn ṭumin kum 25 mi Marc-Andre ter Stegen-a'n a veng thung.

Barcelona keeper Ter Stegen chu tun inelna match hnihnaa Chile an hmachhawn ṭumin ven tir a ni a, match thumnaa Cameroon an hmachhawn ṭumin Trapp chu inlan tura ngaih a ni. Amaherawhchu, coach Low-a'n ngaihdan nghet neiin Ter Stegen chu match zawnin a ventir a, final an thleng a nih chuan Barcelona keeper hi a ring tlang ang a, inelna zawh hnuah pawh Neuer-a thachhang dawltu a nih ngei a rinawm.

Mual sirah El Tri
El Tri (Mexico hming lem) hi mual sir lamah an hlauhawm - Carlos Vela, Hrving Lozano, Javier Aquino emaw Jurgen Damm pawh lut se Germany tan ven uluk vek an ṭul ang. Mexico coach Osorio-a'n Portugal an hmachhawn ṭumin Javier Hernandez chu vei lamah dahin New Zealand nen an inkhelh ṭumin Raul Jimenez a chhawr bawk. Mexican forward te hi winger-ah pawh chhawr theih a ni a, an hna an bel ṭhat avangin an goal nawr a na ang.

Team pahnih player khai­khinin Germany hi kum lamah naupang mah se theihna leh club lamah tawnhriat an neih ṭhat avangin rinkai zawk an ni. Amaherawhchu Osorio hian thla 18 chhung Mexico a enkawl tawh a, khelhdan phung thlak danglamin tunah hian a rah an seng chho mek.

Mexico hian kum 1985 khan a vawi khat nan Germany hi an hneh a, Die Mannschaft erawh vawi nga chakin vawi li dangah erawh an inhnehtawk. Zanin hian El Tri hian kum 32 hnua a vawi khat nana hnehna an chang a nih pawhin thil mak a ni lo ang.

Semifinal Kalkawng
GERMANY
Australia 2 - 3 Germany
AUS : Tom Rogic 41'; Tomi Juric 56'
GER : Lars Stindl 5'; Julian Draxler 44'(P);
Leon Goretzka 48'
Germany 1 - 1 Chile
GER : Lars Stindl 41'
CHI : Alexis Sanchez 6'
Germany 3 - 1 Cameroon
GER : Kerem Demirbay 48'; Timo Werner 66’, 81’
CAM : Vincent Aboubakar 79'
MEXICO
Mexico 2 - 2 Portugal
MEX : Javier Hernández 42'; Hector Moreno 90+1'
POR : Ricardo Quaresma 34'; Cedric Soares 86'
Mexico 2 - 1 New Zealand
MEX : Raul Jimenez 54'; Oribe Peralta 72'
NEW : Chris Wood 42'
Mexico 2 - 1 Russia
MEX : Nestor Araujo 30'; Hirving Lozano 52'
RUS : Aleksandr Samedov 25'