Mizote hi inkhelh thiam tur an ni - Chopra

Newcastle United stri­­ker hlui Michael Cho­pra chuan, Mizote chu an awmna hmunin a zir avang­­in inkhelh thiam tur an nih thu Vanglaini a hrilh.

Kum 33 mi Chopra chuan, "Rooney, Gerrard leh Lampard-te pawh hi an naupan laiin kawngpui leh hmun rem loah an inkhel nasa a, heta ṭang hian thil tam tak an thiam a ni. Mizote pawh kawngpuiah an inkhel nasa tih ka lo hria a, hei vang hian inkhelh thiam tur an ni," tiin a sawi.

Sunderland leh Cardiff City tan pawha khel tawh Chopra hian nimin zing khan RG Stadium tlawhin Mizoram XI training a thlir a, Tata Trusts hnuaia academy awm tur atana Mizo naupang trial a thlir zui bawk.

Mizoram XI leh FPAI XI ten July 1-a exhibition match an khelh hunah Chopra hi RG Stadium-ah a inlan dawn a, theihtawp a chhuah tur thu a sawi.

FPAI XI striker tur Chopra chuan, "Premier League ka khelh ṭan tirh kha ka tan chuan a hlu a, chona thar a ni. Chutiang bawkin tuna Mizorama kan inkhelh tur pawh hi ka tan chuan chona thar a ni a, Premier League club tana ka theihna zawng zawng ka chhuah ang thoin exhibition match-ah pawh hian ka khel dawn a ni. Eng inelna pawh hmachhawn ila theihtawp chhuah ṭhin mi ka ni," tiin Vanglaini a hrilh.

England Under 21 striker hlui Chopra chuan, "Mizorama ka rawn zin chhan pakhat chu exhi­bition match hi chhiat tawk ṭanpuina atana buatsaih a nih vang a ni. Lei tawlh vanga harsatna tawkte ṭanpuina tura mahni theih­na laia ke pen ve hi ka duh a, Mizo mipuite pawhin ṭanpui ngaite kan ṭanpui theihna tur a ni tih hriain inkhel en ṭheuh turin ka sawm a ni," tiin Mizorama a rawn zin chhan a sawi.