Player lian inhmachhawn har dawn

Khawvela tennis tour­nament upa ber Wim­­bledon chu July 3, Thawhṭanni aṭangin khelh ṭan a ni dawn a, nimin khan seeded chang phak chin tar chhuha niin 'Big Four' tia sawi ṭhinte chu semi­final hma chuan an in­hmachhawn thei dawn lo.

Tennis huangah chuan Roger Federer, Rafael Nadal, Novak Djokovic leh Andy Murray te hi 'Big Four' tia sawi ṭhin an ni. Kuminah world number 1 leh champion lai Murray chu seeded pakhatna niin Djokovic (2), Federer (3) leh Nadal (4) ten an dawt - Zirtawpniah draw neih zui tur a ni ang.

Hmeichhe singles lamah world number 2 Angelique Kerber chu seeded pa­khatna niin world ranking lama a hnuai chiaha awm Simona Halep chu pahnihna a ni. Hmeichhe inelna lamah hian nomawi kawl mektu Serena Williams chu nau a pai avangin a inlan thei dawn lo a ni.

Grand Slam zinga ngaihhlut Wimbledon-ah hian mipa leh hmeichhe singles-ah player 128 ve ve an inlan ṭhin. Mipa bikah world ranking-a a sang 104 leh hmeichhe ranking 108-na chin chu tling chiang sa an ni a, heng inelna pahnihah hian wildcard pariat ve ve sem chhuah niin a bak zawng chu world number 200 chinin qualifier hmangin an hnawhkhat ṭhin - doubles huangah team 16 an inlan ṭhin bawk.

Kuminah hian lawm­man tihpun a ni dawn, mipa leh hmeichhe cham­pion hian £2,200,000 (Rs 18,22,97,007) an dawng ang a, pahnihnain £1,­100,000 (Rs 9,11,27,300) an dawng thung ang.