Chawlh dan duhthusam a ni - Samson
Mizo midfielder ṭha Samson Ramengmawia chuan CYMA Football 2017-ah Ramhlun South a champion pui hnuah football khelh a chawlhsan.
Shillong Lajong captain hlui Samson chuan, "Inelna hrim hrima champion hi a har a, CYMA Football-a kan veng ka champion pui thei hi ka lawm a. Tuna kan chawlh dan hi ka tan chuan duhthusam a ni," tiin Vanglaini a hrilh.
Kum 2008 khan CYMA Football-ah a vawi khat nan Ramhlun South an champion a, hemi ṭum hian Samson-a hian match hmasa pahnih khel mah se Mizoram aiawh tura koh a nih avangin a khel chhunzawm lo. Tun ṭumah erawh Samson-a'n player pawimawh nichungin an veng chu inelna ngaihhlut CYMA Football-ah a champion pui a, a boot a khai zui bawk.
July 1, Inrinnia Mizoram XI leh FPAI XI ten exhibition match an khelh hunah Samson hi assistant coach a ni dawn.
Zo United enkawl tawhtu Samson-a chuan, "Phai lama Mizo player ṭhate leh tualchhunga player ṭhate chhawr theih turin an awm a, a phurawm hlein ka hria. Inkhel hmuhnawm tak kan phochhuah theih ka beisei a, Mizo mipuite inkhel en ṭheuh turin ka sawm a ni," tiin a sawi.