FPAI Awards Coach of the year dawng thei zingah Khalid
Football Players' Association of India chuan July 1-a Rajiv Gandhi Stadium-a FPAI Awards an sem tur zinga Coach of the Year dawng thei tur hming an chhawp chhuak a, an zinga hming langsar ber chu Aizawl FC coach Khalid Jamil a ni.
India international hlui Khalid bakah hian Mohun Bagan coach Sanjoy Sen, Shillong Lajong coach Thangboi Singto, Churchill Brothers boss Derrick Pereira leh East Bengal boss Trevor Morgan-te hming chhawpchhuah a ni bawk a, an langsar hlawm hle.
Beiseina nen Khalid
FPAI coach of the year dawng turin Khalid Jamil chu rin hlawh ber a ni. Kuwait a piang Indian coach hian I League-ah club 'tenau' Aizawl FC chu champion nomawi chawipuiin Indian football a barakhaih a, Leicester City-in 2015-16 a Premier League nomawi an chawi nen phai media ten an khaikhin nasa hle. Mizo club hian Federation Cup-ah semifinal an thleng bawk.
India-in Khalid-a hnathawh a hmuhmaih lo. Indian Football Awards-ah Best I League coach chawimawina pek a ni a, Kolkata club lian East Bengal chuan Indian coach awm tawha hlawh hnem ber ni turin kum hnih chhung atan vaibelchhe 1.25-in contract an ziahpui.
Bagan boss Sanjoy
Sanjoy Sen-a'n Mohun Bagan-a a season hmasa ber 2014-15 a I League nomawi a chawi hnuah Indian coach langsar zingah a hming lam hmaih a ni tawh ngai lo. Bengali coach kaihhruaina hnuaiah Bagan hian 2016-17 season a league match hnuhnung ber thlengin Aizawl FC chu I League nomawi an chuhpui thei a ni.
Federation Cup-ah pawh Bagan-in team ṭha an nihzia an pholang nawn a, final an thleng. Mahse, final-ah Bengaluru FC an ngam lo a, Sanjoy Sen-a nauten India rama club inelna sang pahnihah pahnihna ni ve ve chungin season an khar.
Thangboi hming a thang
Thangboi Singto-a'n budget tlem tak neichungin Shillong Lajong a kaihruai a, I League-ah pangana nichungin season an khar. Manipur coach hian player naupang zawk a chher thiamna chu a hmingṭhatpui hle a, Isaac Vanmalsawma, Samuel Lalmuanpuia , Nim Dorjee Tamang leh Chinglensana Singh-te chu Thangboi 'chherchhuah' ah chhal theih an ni.
Kum 43-a upa manager hnathawh hi sum tamna Indian Super League lam pawhin an hmuh hmaih lo. Meghalaya club-a contract thar a ziah loh hnuin Kerala Blasters chu assistant manager ni turin a zawm a, youth development lam a buaipui bawk ang.
Churchill chhandamtu Pereira
Churchill Brothers-in kum rei tak hnuah I League-a an hmel an lan lehna hmasa berah beisei an phak lo a, table mawngphah an luahlum lai February 17 khan anmahni chhan chhuak turin tawnhriat nei ngah coach Derrick Pereira an lalut.
Goan coach enkawlna hnuaiah Churchill hian league match kua an khel a, vawi thum hnehna changin vawi li an tlawm a, vawi hnih an khingpui an inhnehtawkpui. Pereira awm hmaa table mawngphah luahlumtu club hian team 10 inelna I League-ah parukna nichungin season an khar a, Goan coach-in a hna a tlin hle.
Brtitish coach Morgan
Season hmasa ṭan dawn khan Trevor Morgan-a'n a vawi hnih nan East Bengal a zawm a, Calcutta Football League-ah a champion pui nghal. English coach hian I League-ah erawh champion tura beiseina a ti hlawhtling thei lo a, mah se FPAI lam chuan a hnathawhte enin Coach of the Year ni thei zinga chhawpchhuah tlakah an ngai.
Bolton Wanderers player hlui hian I League-ah East Bengal chu pathumna nichungin season a kharpui a, league match 18-ah vawi 10 hnehna a chanpui a, vawi thum an khingpui inhnehtawkpuiin heng zinga pangaah hian a tlawm zawkah an ṭang. British coach hian Federation Cup-ah erawh Kolkata club a kaihruai chhunzawm lo.
FPAI Awards
Coach of the Year dawng thei turte
Khalid Jamil Aizawl FC
Sanjoy Sen Mohun Bagan
Thangboi Singto Shillong Lajong
Derrick Pereira Churchill Brothers
Trevor Morgan East Bengal