Andy Murray a hliam

World number 1 Andy Murray tan tun hnaiah chanchin ṭha hriat tur a vang hle. Queen's Club Championship-a first round a paltlang zawh loh hnuin Hurlingham Club-ah exhibition match khelh a tum leh a, mahse khêl na vangin a inlan thei lo.

July 3 aṭangin Wim­bledon khelh ṭan tur a ni a, tunkar chhung bak inbuatsaihna hun a awm tawh lo. Britain tlangval hian Zirtawpniah grass court match khat tal khelh theih a beisei thu a sawi.

Kum 30-a upa Murray hian season hmasa khan Wimbledon nomawi a chawi hnuah Rio Olympic gold medal a la zui a, Serbian tlangval Novak Djokovic khumin world number 1 a ni hial.

Mahse, Murray hian kuminah beisei a phak thei rih lo. ATP ranking-ah a chung berah a awm rih chungin Wimbledon-ah hian rinkai ber a ni dawn lo. Tun hnaiah Rafael Nadal leh Roger Federer te an khel ṭha tlung hle a, an kum tam deuh tawh mah se player dangte tana tawh khirh ber turte zinga mi an la ni.

World number 4 Djo­­kovic pawhin kum danga a tih ngai loh Wim­bledon inbuatsaih nan tournament a khel ve. Thawhṭanni zan khan Eastbourne Internationa Open-ah first round a khel, mahse minute kaw chhunga game hmasa ber a lak bak chu ruah sur vangin an khel zui thei lo a ni.