Alves-a'n Juve a mangṭha ta

Dani Alves chuan Italian Juventus nen an inkar a tawp thu a puang chiang ta. Brazil international defender ngaihventu Manchester City tan chan­chin lawmawm a ni ang.

Kum 34 mi Alves chuan, "Juventus nen kan inzawmna chu a tawp ta. An duh loh zawnga ka awm avangin fan-te chungah ngaihdam ka dil a, min ṭawiawmna zawng zawngah lawmthu ka sawi thung. Juve hi club lian leh ropui a ni a, player ṭha rual an awm khawm, an rilru puthmang puitling tak hi ka theihnghilh tawh lo ang," tiin a sawi a, a chhuah chhan chu sum vang a nih loh thu a sawi tel bawk.

Brazil tana match 100 khel tawh Alves hian season hmasa khan Barcelona aṭangin Juventus hi a zawm a, Turin club tan season khat chhungin Serie A leh Coppa Italia nomawi a chawi bakah Champions League final a khel bawk.

Juventus chief executive Beppe Marotta chuan kar hmasa khan Alves hian chhuah a duh a nih chuan an dan loh tur thu a sawi tawh. Catalan club lama Alves enkawl tawhtu Pep-a'n a tlarhnung thuam chak nan lakluh a duh nia sawi a ni a, club nei loa a awm takah chuan hun rei lote chhungin Etihad Stadium-ah a senglut tura ngaih a ni.