Chhinga Veng-ah Sawmfela

Tualchhung club zinga thawm nei lian ber Chhinga Vengin MPL5 best player Malsawmfela an lalut a, Chhingcows hian Ramhlun South tlangval an lakluh hma hian Mizo striker MS Dawngliana, Lalkhawpuimawia leh Lalrammuanpuia (Apuia) te an ziaklut tawh bawk.

CYMA Football 2017-ah Sawmfela'n an veng Ramhlun South a champion pui a, season liam ta khan Chanmari FC chu MPL-ah champion puiin best player atana thlan a nih bakah best forward chawimawina a dawng a, top scorer Laldampuia nen goal 11 ve ve an khung.

Sawmfela hian Mizoram aiawhin vawi tam a khel tawh a, India junior team tan a khel tawh bawk. Chhinga Veng hian Sawmfela bakah Ramhlun North FC aṭangin Lalchhuanpuia leh nikum I Day Football best player Zosangliana (Chhaia) an lalut bawk.