Gopi kaihhruai India tlangval ten hma an sawn

India badminton sawi rualin Saina Nehwal leh PV Sindhu-te bakah chief coach Pullela Gopi­chand mitthlaah an rawn lang nghal ṭhin a, Hyderabad nula pa­hnihte hian khawvel huap inelna lianah India hming an ti ṭha ṭhin, anmahni chher chhuaktu Gopi-a hming pawh kan lam ngun hle.

Hmeichhe player an lansarh laiin mipa shuttler-te thawm a ring ngai meuh lo, tunah erawh thil a inthakthleng chho mek. Inelna lian apiang deuhthawah Kidambi Srikanth, Sai Praneeth leh HS Prannoy te hming lam rik a ni a, tun hma zawng aiin India tlangval ten badminton khawvel an al hneh ta.

Pasalṭha rual

India pasalṭha rualten tun hnaiah badminton inelna an thunun a tih theih. Indonesia leh Australia Open Super Series-ah Srikanth a champion a, Singapore Super Series leh Thailand Grand Prix Gold-ah Praneeth-a'n nomawi a chawi ve thung - international tournament lian neih hnuhnung panga zinga paliah Indian shuttler an champion!

Srikanth leh Praneeth ten no­mawi an chawi a, an hming a lang­sar. Hetihlai hian Prannoy leh Paru­palli Kashyap te hming kan lam hmaih thiang bik lo. Tun hma deuhin nomawi an chawi tawh bakah tun hnaiah an ṭhian ten hlawhtlinna an chan theih nan kawng an sial sak.

Jakarta-ah khan Prannoy-a'n legend Lee Chong Wei leh Olympic champion Chen Long a hneh a, Srikanth tan kawng a sial sakah a ngaih theih. Australia lamah khan Commonwealth Games-a gold medal dawng tawhtu Kashyap-a'n Indonesia Open finalist Kazumasa Sakai chu qualifying stage-ah a vaw tla bawk.

Kum 1980 khan Prakash Padu­kone-a'n All England title a la a, he hmunah hian Pullela Gopichand-a'n kum 2001 khan hlawhtlinna a chang bawk. Heng hun hlimawm pahnih a liam hnuah chuan tun hi India mipa ten badminton khawvela an tawn san lai ber a ni.

Tun dinhmnunah India hian world ranking-a a sang 35 zingah shuttler paruk a nei thei a, August thla a neih tur World Championship atan pawh beiseina a sang hle. Tun ang zela hmasawnna a kal a nih chuan India-ah nomawi lian tham tam zawk a lut tura ngaih a ni.

Hei le Srikanth

Tunlai badminton khawvela hming langsar ber chu Lin Dan, Lee Chong Wei leh Chen Long te ni loin Ravulapalem, Andhra Pra­desh-a piang Kidambi Srikanth a ni.

Gopichand Badminton Aca­demy, Hyderabad aṭanga inzir chhuak feet 5 leh inches 10-a sang Srikanth hian kum 2014 khan khatih laia Olympic champion nilai Lin Dan chu 21-19, 21-17 a hnehin China Open Super Series Premier nomawi a chawi a, India tlangval zingah Super Series Premier title la thei hmasa ber a ni.

Srikanth hian kum 2015 khan India Open a lak bak nomawi lian tham a chawi lo a, kum 2016-ah phei chuan hliam a neih fo avangin inelna lianah a champion lo.

A ke rek a dam hnuah erawh Srikanth hi dan theih a ni tawh lo - kumin chhungin Singapore Open-ah pahnihna niin Indonesia leh Australia-ah a champion zawn ta! India badminton player zingah a zawna Super Series title la thei awmchhun a ni ta hial.

World number 11 Srikanth chuan, "Rio Olympic-a ka ke rek a hliam hnuah ka hmanhmawh duh lo a, hliam a dam chian ṭhat hma chu dawhthei takin ka nghak. Tuna ka hmabak lian tak chu World Championship a ni a, inbuatsaihna ngawrh takin ka nei zui nghal ang," a ti. Srikanth hian hlawhtlinna a chan theih nana mi pawimawh tak chu national coach Pullela Gopichand a nih thu a sawi tel bawk.

Gopi thluak

A vanglaia All England Open Badminton Champion ni thei Gopichand-a'n India shuttler ten hma an sawn theihnan ngun takin ngaihtuahna a seng a, player naupang zawkte chher hriam chu hna pawimawh a nih zia hriain a bul-ṭhut atan Hyderabad, Telangana-ah academy a din.

Gopichand chuan, "Kan hun lai leh hmanlai deuh pawh khan theihna nei sang tak tak Chetan Anand, Anup Sridhar, Arvind Bhatt leh Nikhil Kanetkar te an lo chhuak tawh. Mahse, kan fitness te, speed leh dawhtheihna kan nei ṭha tawk lo. Tin, coaching system mumal tak kan nei lo bawk," tiin a sawi.

Kum 43 mi Gopichand chuan sawi chhunzawmin, "Tun hma kha chuan ranking tih san nan tournament lian vak lo kan khel hnem a, kha thil kha a fuh tawk loa hriatna ka neih avangin Saina kha Super Series-ah ka inlan tir a, ka ti sual lo. Inelna liana hlawhtling turin huaisenna kan neih chuan theihna kan nei sang ve tawk," a ti.

Danglamna a thlen chhoh dan sawi zuiin Gopi chuan, "Hmeichhe player ten hlawhtlinna an chan lansarh hmasak chhan chu theihna nei sang tak Saina leh Sindhu ka neih vang a ni. Mipa lam hi an fitness leh rilru put hmang siam rem turin hun a duh rei deuh. Kum bithliah inelna lamah bul ṭanin tunah chuan a rah duhawm kan seng chho mek a ni," tiin a sawi.