Real-in Zidane an chelh dawn

Spanish club lian Real Madrid president Florentino Perez chuan chawlh zawh ruala an hna hmasa ber tur chu an coach Zinedine Zidane hnena contract thar zawrh a nih thu a sawi.

Perez hian Champions League nomawi an chawi hnu lawk khan Zidane chu Real-ah a dam chhung atan a cham theih tur thu a lo sawi tawh.

Real president Perez chuan, "Chawlh te han hmang zo se, Santiago Bernabeu-a a lo kir leh hma­sak bera kan tih tur chu contract thar zawrh a ni ang. He club chhung­kua leh a dinhmun hi Zidane aia hrechiang an awm chuang lo a, hei tak hian a tan hnathawh a ti awlsamin tun hnai thla 17 chhunga a hlawhtlinnaah pawh hei hian thui takin hna a thawk a ni," a ti.

Perez chuan sawi chhun­zawmin, "Zidane hian media ho hmaah Real-a a cham chen tur a hriat loh thu a sawi ṭhin a, hei hi a chhan ber chu player-te hma hun an zawh vak vak ṭhin a pumpelh theih a inbeisei vang a ni. Mahse, ka sawi duh chu, Zidane ho hian vawiina kan nomawi chawi te hi nei lo mah ila contract thar ka zawrh tho ang," tiin a sawi.

Real Madrid president chuan tun hnaia chhuak tur anga sawi Cristiano Ronaldo chu a thinrim ngei thu sawiin an hnenah erawh a cham zel tur thu a sawi a, tun hnaia Real-a lut tur anga sawi Kylian Mbappe tan hmun ruak a awm loh thu sawi nghalin, "Mbappe lo lut se tu nge kan chhuahtir ang? Khawvela squad ṭha ber kan nei mek a ni," tiin player thar lak a tum lo.