Euro U21 Germany leh Spain-in final an lut
England Under 21-in thla hnih chhunga England youth team-in final an luh vawi lina thlen tir tum viau mah se European Under-21 Championship semifinal-ah Germany chu penalty-ah 4-3 in an ngam lo a, Euro inelna an mangṭha.
Spain-in Saul Niguez an nei a, Atletico Madrid midfielder duhawm 'hattrick' hmang hian Italy chu 3-1 in an hneh ve bawk. Zirtawpni zan khian Germany nen Euro-a kum 21 hnuai lam zinga a thiam ber nih an in chuh ang.
Inhnehtawk
England leh Germany inkhel hi nghahhlelh lawk ang ngeiin a hmuhnawm a, goal khung hmasatu chu German rawlthar an ni. RB Leipzig striker duhawm Davie Selke chuan minute 35-naah an goal hmahruai hi a khung a, Germany lawm chhung erawh a rei lo. Goal an chhuah aṭanga minute ruk hnu lawkah England-in an siphurh an sut a, Leicester City winger Demarai Gray chuan James Ward-Prowse corner aṭanga ball lokal chu a khung.
Goal dang lut loin chawlhlawk hman a ni. Second half-a goal hmu turin nghah rei erawh a ngai lo. Minute 50-naah Will Hughes a inlar a, Watford-in pound maktaduai riata an lei thar midfielder hian Tammy Abraham tan ball duhthusam a pe - Young Lions (England youth team sawina)-in hma an hruai. Beisei angin thil erawh a kal vek lo, Felix Platte chuan Germany tan an si phurh a sut ve leh a, extra time khelh a ni.
Redmond van a duai
Minute 90-ah team pahnih 2-2 in an inhnehtawk a, chak zawk awm turin minute 30 dang khelh a ṭul. English leh German rawlthar te final lut zawk nih tumin an innawr tawn zak zak a, goal erawh hmuh tur a awm lo. Penalty hmanga chak zawk zawn a ni.
England goalkeeper Jordan Pickford-a'n penalty hmasa ber a chhuah hnuah a vawi hnihna erawh a dang a, England beiseina a nung. Mahse, Everton keeper thar chet ṭhat hnu lawkah German keeper Julian Pollersbeck chuan Tammy Abraham penalty pet chu hming chher nan a hmang ve leh zui. England an vanduai chhunzawm a, Nadiem Amiri-a'n Germany tan a pet goal laia Nathan Redmond-a'n a pet goal ve loh avangin Germany U21 an chak.
German ral lian
England tan chuan Germany hi 'mangchhia' ang mai an ni. World Cup 1990 semi final-ah khan hun pangngaia an inhnehtawk hnuin West Germany chuan England chu 4-3 in penalty-ah an hnawt chhuak a, Euro 1996 semifinal-ah khan Gareth Southgate penalty khung loh zarzoin Germany hian England hi an lo hnawt chhuak tawh bawk.
England Under-21 boss Aidy Boothroyd chuan, "Hetianga kan tlawm ta mai hi chu hriatthiam a har takzet a ni. Inkhel ṭantir lamah kan ṭhat dan berin kan khel lo a ni mai thei a, mahse British mi nihna diktak pholangin huaisen takin kan bei let a ni. Penalty hi vawi tam tak kan zir a, mahse an goalkeeper penalty dan pahnih kha a ṭha chungchuang em a ni. Zinkawng thui tak a ni a, ka naute zingah hian senior team tana la khel tur an awm ka ring a ni," tiin England hmalam hun atan squad ṭha tak an nei niin a ngai.
Saul a hrang
Atletico Madrid midfielder Saul Niguez-a'n Italy U21 tana hmachhawn tur chuan a lian mah mah tih pholangin hattrick a siam a, Italy lakah an ram chu hnehna a chanpui. Spain senior team tan pawha vawi thum lo inlan tawh Niguez hian minute 53-naah a goal hmasa ber a khung a, Italy tan Roberto Gagliardini chu goal an chhuah hnu lawkah hnawhchhuah a nih bawk si avangin Spain hi awlsam takin an chak dawn niin a lang hman.
Mahse, Italy-in Federico Bernardeschi hmangin an si phurh an sut. Mahse, Spain-in Saul an nei miau a, season hman zawh taka Atletico tana match 53 inlan thei midfielder hian goal an chhuah aṭanga minute thum hnu lawkah yard 30 vela hla aṭanga khalh tlangin a goal hnihna a khung a, Real Madrid winger Marco Asensio cross chu hattrick siam nan a hmang bawk - player 10 nichunga khel Italy-in an si phurh sut turin tha an nei tawh lo a, Spain an chak.