Amahin Russia inendik leh dawn

World Anti-Doping Agency (WADA) chuan thuchhuah siamin Russian Anti-Doping Agency (RUSADA) chuan anmahniin an ram chhunga infiammite an endik leh thei tawh dawn, mah se hei hi mi ruat bik te bakah UK Anti-Doping (UKADA) kaihhruaina hnuaia neih tur a ni ang.

Infiammiten damdawi hman phal loh an hman leh hman loh chung­­chang endiktu lian ber WADA chuan Russia hian ram sorkar hriatpuina ngeia thil dik lo an tih avangin a hrem mek, tunah erawh hremna hi thlah zal a ni dawn ta tihna a ni.

WADA hnuaia Russia zir­chiangtu McLaren-a report-in a tarlan dan chuan Russia hian kum 2011-2015 chhung khan infiammi dan bawhchhia 1,000 chuang zet chu a zep sak niin a sawi a, hei vang hian khawvel huap inelna hrang hrangah an tel leh phal loh an ni mek.

WADA president Sir Craig Reedie chuan, "Russia tan puan ven sawi chhin theihna hun ṭha a inhawng leh ta a, kan lawmpui hle. Khawvel huapa an ṭhat zia an lantir chhuah leh thuai theih ngei kan beisei," tiin a sawi.