Everton-in striker an melh
Nipui transfer-a player pahnih goalkeeper Jordan Pickford leh Ajax captain Davy Klaassen lakluh nana pound maktaduai 54-in seng tawh Everton-in an la duh tawk lo a, Nigerian striker Henry Onyekuru chu KAS Eupen aṭanga pound maktaduai sarih a lakluh tumin indawrna an kalpui mek.
Kum 20-a upa striker hian season hman zawh takah khan Belgian club tan hian match 41 khelin goal 24 a khung a, Arsenal leh West Ham United nen pawh sawizawm ni mah se Thawhṭanni khan Everton-ah medical a hmachhawn.
Everton chuan Henry Onyekuru hi an lalut a nih pawhin chhawr nghal erawh an tum lo a, a club Eupen-ah hian season khat chu inchher hriam turin loan-in an kaltir leh phawt ang. Everton director of football Steve Walsh leh manager Ronald Koeman-te chuan Nigeria international hi club hmalam hun zelah an chhawr an inbeisei a ni.
Merseyside club hian Malaga striker Sandro Ramirez chu season tharah an hnena khel turin inremna an siampui tawh bawk a, mahse kum 21-a upa striker hi Euro U21 khel mek Spain Under 21 squad-ah a awm mek avangin official-a puanchhuahna an la nei thei lo.
Everton hian Sandro manah hian pound maktaduai 5.2 an pe dawn a ni. Barcelona striker hlui hian season hman zawh takah khan Malaga tan inelna hrang hrangah match 31 khelin goal 16 ngawt a khungsak thei a ni.
Toffees boss Koeman chuan Burnley-in pound maktaduai 25 man an chhiar England defender Michael Keane chu a beisei mek bawk a, Sawnsea aṭangin midfielder Gylfi Sigurdsson lakluh an tum bawk. Iceland international man zat hi pound maktaduai 30 ai chuan a tlem lo turah an ngai.
Everton hin pound maktaduai 10-a Burnley struker Andre Gray lakluh tumin an ngaihven bawk.