Allegri-a'n Bonucci a hauh na

Massimiliano Allegri chuan an defender Leonardo Bonucci chu nakin zelah Juventus player dangte kaihruaitu tur a nih thu a sawi, Italy international lakluh tumtu club lian dang tan chanchin lawmawm a ni lo tawp ang.

Juve leh Italy team-a amah kaihruai tawhtu Antonio Conte chuan Bonucci hi Chelsea-ah lakluh a duh nia sawi a ni a, Arab sum hmang a siam len Manchester City lama seng lut turin Pep Guardiola pawhin a hel mek nia sawi a ni bawk.

Kum 30-a upa Bonucci hi manager nen an inhnial buai vangin February thlaa Porto nen Champions League last 16 an khelh ṭum khan squad aṭanga dah chhuah a ni a, he thil thleng vang hian a chhuak dawn nia sawi thawm a ri ring zual hle.

Turin club manager Allegri chuan, "Team zinga Leo ka telh loh khan amah chauh ni loin keimah ngei pawh ka inhrem tel a ni. Ani hi chu khelmual chhung mai bakah a pawnah pawh mi danglam leh ṭha bik a ni a, nakin zelah pawh Juve player dangte kaihruai zel tur a ni," tiin a sawi.