Arsenal leh City tan sahuai ser hun

Zanin dar 12:15 hian Arsenal chuan Wembley Stadium-ah Manchester City an hmachhawn dawn. Tehna hrang hrang aṭanga teh chuan Pep Guardiola naute chak tura ngaih an ni a, mahse a ni bik ngawt lo - tun ṭum chu FA Cup semifinal a ni tlat.

Gunners leh Man City hian Premier League-ah beisei an nei tawh lo, an league match khelh hnhnung berah pawh FA Cup ngaihtuah chungin player an siksawi; zaninah erawh an neih ṭhat ber an chhawp chhuak ang.

Dinhmun inang lo

Tun hnai kum 10 chhung chu Arsenal hian league-ah Manchester City chunga awm chungin vawi khat chauh season an khar. Pep Guardiola rawn lan hnuah phei chuan an dinhmun a inthlau hle, an intawn hnuhnung pasarihah City lamin hnehna an chang vek.

Arsene Wenger awm lai khan Gunners hian a zawnin season 19 chhung chu Champions League an khel, tunah erawh a kum zawnin vawi li chu an khel phak dawn ta lo. Man City erawh an inlan reng thung a, season tharah pawh an inlan chhunzawm leh ang.

Mikel Arteta-a'n UCL an khelh phak dawn loh avangin Europa League tal khelh a duh a, league aṭang chuan a harsa tawh. FA Cup champion an nih erawh chuan an khel thei dawn, nomawi chawi chunga European football khelh phak chu an duhthusam a ni dawn.

Liverpool an hneh 

ṭumin Arteta-a'n player a siksawi, captain Pierre-Emerick Aubameyang chu bench-ah dah a ni; zaninah erawh tlarhma luahtu a ni ang. Reds laka khel ṭha David Luiz-a'n tlarhnungah tu nge a dinpui ang tih erawh hriat a la ni lo.

Twitter lamah Mesut Ozil-a'n 'Ka inpeih ta' tiin training lai thlalak a tarlang a, mahse Reds hmachhawn tur squad-ah khan a hming a lang lo! Real Madrid playmaker hlui hi zaninah a inlan lo leh a nih chuan North London club tana a hma hun chu a zoah a ngaih theih ang.

Kevin De Bruyne, Raheem Sterling, Riyad Mahrez, Rodri leh Aymeric Laporte ten tha tharin Arsenal an hmachhawn thei dawn. Player ṭha panga hi Bournemouth an hmachhawn ṭumin hahchawlhtir vek an ni; Pep Guardiola tan a thlamuan thlak kawp ang.

Man City hian league nomawi hloh mah se UEFA-in a hremna hlihsak an nih avangin an hlim lai a ni, season duhawm hmang rih lo mah se FA Cup baka an duh ber UCL an chawi a nih chuan hlawhtlina sang tak a ni dawn.

Guardiola tan a hnuaia intuaihriam leh squad nei pan zawk Arteta hmachhawn hi thil huphurhawm a ni dawn lo. Amaherawhchu an khingpui tur Arsenal hi FA Cup record nei ṭha ber an ni a, knockout a nih avangin chesual thei an ni ve tho.