US Open hnuah Serena a chawl dawn

Hmeichhia chauh a ni lo, tennis pumpui thlir pawha player ropui berte zinga mi Serena Williams chuan chawlh a tum hnai. US Open 2022 khelh zawhah American star hian tennis chawlhsan a tum, a tan chuan a inkhelh apiang hi match hnuhnung ber a ni zel tawh tihna a ni.

Grand Slam vawi 23 champion tawh Serena hi Vogue magazine phek hmaah a lang a, hetah hian, "Thil pawimawh dang a awm tawh, 'chawlh' tih ṭawngkam hi chu ka duh ngai lo," tiin a sawi a, a chawlh thu la puang chiah lo mah se a chawl dawn tih a sawina a ni.

Instagram lamah Serena hian thu a ziak zui, "Tawpna ni kan chhiar ṭan, ka hmabaka chawlhkar ka hman turte hi nuam ka ti khawp ang," tiin a sawi a, chhungkaw nu nihna chu a tan mawhphurhna lian leh a hlen chhuah tur a nih thu a sawi bawk.

Tun dinhmun
Hliam leh harsatna hrang hrang vangin Serena hi tun hnaiah a inkhel tam lo. Thla 14 hnuah singles match a khel leh chiah a, US Open inbuatsaihna zinga mi National Bank Open-ah telin match hmasa berah a chak.

Kum 40 mi Serena chuan, "Wimbledon champion nih kha ka tum a, mahse ka thei ta lo. New York khawpuiah hian ka champion thei dawm em, ka hre lo, mahse champion ngei tumin ka inlan dawn a ni," tiin theihtawp a chhuah tur thu a sawi.

American star chuan sawi zawmin, "Tennis ka khelh chhungin hun nuam leh hlimawm tam tak ka tawng. Mangṭha tih thu hi sawi ka duh ngai lo, khawvela thumal hriat nuam lo ber a niin ka hria.

"Mahse, mangṭhana karah pawh hian lawmna tur a awm ve ṭhin bawk. Min ṭantute hian ka lungngaihna leh hrehawmna aia nasa leh sang zawkin hlimna min siamsak ve thung, hei hi ka theihnghilh tawh loh tur thil a ni," tiin a sawi.

Grand Slam record
Tennis inelna lian leh sang ber chu Grand Slam a ni. Major tournament tia an sawi bawkah hian Margaret Court-i chu vawi 24 a champion thei a, ani aia champion hnem an awm lo - amah hnaih bertu chu Serena a ni.

Serena hian Grand Slam title 23 a la tawh a, record siam hnem ber nih rual theihna remchang hi nei nual mah se a vanduai zawkah a ṭang leh ṭhin. A tan chuan US Open hi hun hnunhnung ber tihna a ni dawn, a theihtawp a chhuah lehzual ngei ang tih a chiang.

US Open bikah hian vawi ruk (1999, 2002, 2008, 2012, 2013, 2014) ngawt a champion tawh a, a mikhual dawn lo hle. A tan chuan hard court chhunga hlawhtlinna chan hi thil harsa a ni hran lo - Australian Open pawh vawi sarih ngawt a chawi tawh bawk.

Australian Open leh Wimbledon title hi vawi sarih ve ve a la a, a champion hnemna an ni. Grand Slam zingah chuan French Open khelh harsa a ti ber, clay court inelna lianah pawh hian vawi thum chu a champion tho - a ṭhat lohna ber pawh midangte ṭhatna nen a intiat tawk vel.

Thil harsa ber

Thutlukna harsa a nih thu sawi zuiin Serena chuan, "Ka pasal Alexis nen kan sawidun fo a, thil harsa tawp a ni. Ka nu leh pa bulah phei chuan ka sawi thei lo, biangah mittui dan sen loh a lo luang mai ṭhin.

"Mi tam tak chuan hlim takin an infiamna khelh ṭhin an chawlhsan ṭhin tih ka hria, anni ang rilru put theih ka châk hle," tiin a sawi a, tunah chuan thil dang ngaihtuah a ngah tawh avangin a tan hlim taka tennis khelh zel pawh thil awlsam a nih loh thu a sawi bawk.

Serena hian 1999 US Open nomawi a chawi kha Grand Slam title a lak hmasak ber a ni a, khatih lai khan kum 17 mi chauh a la ni. Inelna liana a champion hnunhnung ber chu 2017 Australian Open kha a ni thung.

Melbourne khawpuia nomawi a chawi hnu hian, tournament a khelh lai khan a fa hmasa ber Olympia chu chawlhkar riat mi nia a pai mek thu a sawi. Grand Slam nomawi hnunhnung ber hi raipuar chungin a chawi tihna a ni.

Thlahna Thu
" Ka naupan lai chuan Serena Williams inkhel ka en nasa, ani vanga tennis khel hi ka ni. Tennis hi mingo te lalna ram a ni ṭhin, chu chu Serena hian a rawn tidanglam, amah ang hi ka la nih ve theih ka beisei."
- Coco Gauff, world number 11

" Serena hi a chawl a nih chuan, infiammi ropui leh hlawhtling ber angin a chawl ang. Court chhungah champion ropui a ni a, ṭhangtharte tan entawn tur ṭha tam tak a hnutchhiah bawk hi a ropui hle."
- Billie Jean King, world number 1 hlui

" Ani hi chuan hmeichhe tennis kalphung hi a thlak danglam hlawk a ni ber mai. Serena anga hmeichhe tennis awp bet leh thunun rei thei hi an awm leh tawh pawh ka ring lo."
- Emma Raducanu, US Open champion

" Mipa leh hmeichhia thliar theih a ni lo, ani hi chu infiammi ropui berte zinga mi a ni. Tennis huangah chuan mi dang chunga leng a ni a, American nunphunga hnuhma a hnutchhiahte hi a ropui takzet."
- John McEnroe, world number 1 hlui

Serena leh Number
23 Grand Slam singles title neih zat - Open Era china champion hnem ber.
73 WTA titles lak zat, champion hnem lamah pangana a ni.
39 Singles bakah doubles leh mixed doubles huanga Grand Slam lak zat.
14 A unau nu Venus nen major tournament-a doubles title an lak zat.
4 Singles leh doubles huanga Olympic gold medal.
319 World number 1 nih chhung chawlhkar zat.
186 A zawna number 1 nih rei chen chawlhkar zat. Record nei ṭha ber Chris Evert nen an inzat.
$94m Lawmman bika dawn zat.
71.3% Ranking sang zual 10 laka chak record.