Thiago a chawl rei dawn

Premier League-a Liverpool match hmasa bera inhliam, midfielder Thiago Alcantara chu kar engemaw zat a chawl dawn tih puan a ni a, a chawlh chhung tur tak tarlan ni lo mah se tun thlaah chuan a inlan tawh kher lo ang.

Liverpool hian an league match hmasa berah Fulham chu 2-2 in an inhnehtawkpui a, he inkhelah hian Thiago hian a malpuiah hliam tuarin, minute 51-naah Harvey Elliott chuan a thlak a ngai a ni.

Merseyside club Liverpool chuan an player inhliam hi serious tak a nih ring lo mah se, tun kar tawpah a hliam hi endik leh tur niin khawthlang media-te chuan an tarlang.

Liverpool hian hliam vangin Curtis Jones leh Alex Oxlade-Chamberlain te chu an chhawr thei lo mek a, kum 31 mi Thiago a inhliam leh kher hi Reds tan chuan chânna a tling.

Craven Cottage-a Fulham laka an chak zawh loh avanga sawisel hlawh tak Liverpool hian August-ah Crystal Palace (August 15), Manchester United (August 22), Bournemouth (August 27) leh Newcastle United (August 31) te chu an hmachhawn dawn a, Thiago tel loa inkhelh an zir a ṭul dawn.