United-in Arnautovic an lei leh dawn lo

Manchester United chuan Bologna striker Marko Arnautovic lakluh tumin Serie A club dawr mah se inremna an neih hmain indawrna an titawp a, Arnautovic an lalut leh dawn lo.

United boss Erik ten Hag chuan Austria international hi lakluh a duh nia sawi a ni a, mahse, Bologna hian kum 33 mi striker man an chhiar tam hret a, United fans aṭanga duh lohna a nasat bawk avangin Red Devils hi an inhnukdawk leh a ni.

Old Trafford lam hian Arnautovic manah hian euro maktaduai 10 aia tam thehchhuah an phal lo nia sawi a ni a, an dawrna hmasa ber pawh €8mtd bawr vel niin, Bologna hian €15mtd an chhiar thung - a tawpah United an inhnukdawk.

Ten Hag hian player a nih laia a bul ṭanna leh hun tawp hmanna FC Twente-ah Under-17 leh U19 Coach hna a lo chelh tawh a, 2006-2009 inkar khan assistant coach a ni bawk a, 2008-09 ah hian tuna United-a a assistant Steve McClaren chu Twente Coach niin a pu a ni thung.

Hetihlai hian Arnautovic hi Twente tan a khel bawk a, Ten Hag leh McClaren te hian an player hlui hi seng luh an duh. Mahse, Stoke City leh West Ham striker hlui hian English football-ah inchhuanpui tham hna a thawk lo a, United fan-ten an awt lo.

BBC pundit Chris Sutton chuan, "Arnautovic lakluh tum hi a âtthlak takzet a, fiamthu mai emaw ka ti hial. Club ṭantute mit aṭang chuan a dik thei lo a ni," tiin a lo sawi tawh bawk a, United-in khaw dang an hawi ta.

Tun season Premier League-a an match hmasa bera Brighton & Hove Albion laka 2-1 a tlawm United hian striker pangngai chhawr tur an nei rih lo - Anthony Martial a inhliam a, chhuah duh reng Cristiano Ronaldo chu a rilru leh taksa a la in 'fit' tawk lo bawk.

Brighton lakah Christian Eriksen chu false nine anga hman a ni a, an tifuh tawk lo - Arnautovic hian season hman zawh takah khan Serie A match 33 khelin goal 14 a khung.