Leipzig-ah Timo Werner a kir leh ta

Chelsea forward Timo Werner chuan English football-ah beisei anga a hlawhtlin loh hnuin a puanthuah a tel a, a club hlui RB Leipzig lamah a kir leh ta.

German striker hian a club hluiah hian kum li chhung cham turin contract hi a ziak a, Bundesliga club-ah hian kum 2026 thleng chu a khel dawn tihna a ni - a man zat hi tarlan ni lo mah se pound maktaduai 25 bawr vel niin an sawi.

Werner chuan, "RB Leipzig tana ka inkhel leh thei tur hi ka hlim takzet a ni," a ti a, match 159-a goal 95 ngawt a khungna club-ah a hlawhtlin leh ngei a inbeisei hle.

Germany international Werner hi a beisei angin Chelsea-ah hlawhtling lo mah se, kum 26 mi chauh a la nih avangin insiamṭha turin hun a la nei a, Leipzig-ah a hlawhtlin leh ngei a inbeisei ang.

An duh rawn kha!
Germany tan vawi 53 inlana goal 24 khungtu striker hian VfB Stuttgart aṭanga a professional career ṭanin, kum 2016 khan Leipzig a pan - a season hmasa berah match 32 khelin goal 21 a khung nghal.

Hemi hnuah hian Werner a hawikir leh tawh lo - season thum dang khel zuiin, season thumah hian goal 21, 19 leh 34 a khung a, a season hnuhnung ber a khelh meuh hi chuan European club lianten an rim rawn tawh.

A bik takin Liverpool chu Werner duhtu langsar zual an ni a, anni bakah hian Bayern Munich leh Atletico Madrid-in an rim bawk - mahse, a tawpah a release clause, pound maktaduai 45-a ngamtu Chelsea-in an chang.

London club hian an leina club-ah bawk £25mtd-in an hralh a, kum hnih chhung lekin Chelsea hian pound maktaduai 20 zet chu an chân tihna a ni - tifuh lo an inti viau mai thei!

Hmangaih hmasa
Werner-a'n Chelsea tan league match 56-ah goal 10 chiah a khung a, inelna hrang hrangah match 89 khelin goal 23 a khung - £45mtd man chet dan atan a ṭha tawk lo a, kar khatah £272,000 vel a hlawh tih hriat phei chuan a ṭha lo lehzual.

German striker hian a club hlui Leipzig-a kir leh turin nasa takin a hlawh a tihniam nia sawi a ni a, a tihhniamna zat erawh tarlan a ni lo - a club hluiah a hming chher nawn a tum.

Werner chuan, "2016 - 2020 khan Bundesliga-a team thar ni chungin hun duhawm tak kan tawng a, club tana goal khung hnem ber ni chunga chhuah theihte kha a nuam hle.

"Mahse, heng thilte chu hmanlai an ni tawh a, keimah ang thoin kum hnih liam ta chhung khan Leipzig hian nasa takin hma an sawn a, phur takin hma hun ka thlir a ni," a ti.

Mangṭha Timo
Werner-a'n Chelsea-ah beisei phak lo mah se, 2020-21 season-a Champions League nomawi an chawi theih nan player pawimawh a ni a, semifinal-a Real Madrid laka an chakna inkhelah goal pawimawh a khung.

Hei chauh a ni lo - beisei a phak loh avanga thuthang mak pui pui karah Blues tan a rinawm a, a theihtawp a chhuah reng a, hei vang hian London club ṭantute pawhin an ngaina hle.

Werner chuan, "Ka hun tawn hlimawm leh harsaa ka tana in ding tlat ṭhin hi ka hre reng tawh ang," a ti a, "Chelsea-a ka zinkawng chu vawiinah hian a tawp ta," tiin a sawi zui bawk.

Kum 26 mi Werner hian Chelsea tan Champions League bakah UEFA Super Cup leh FIFA Club World Cup champion nomawi a chawi a, London club hlawhtlin nan goal tam tak khung lo mah se a hun têah a rah ṭhin avangin hlawhchham tawpa sawi a rem lo.

Leipzig an ṭha
Italian-German coach Domenico Tedesco kaihhruaina hnuaiah Leipzig an ṭang a, Slovenia forward Benjamin Sesko chu Red Bull Salzburg aṭangin an lalut bawk - kum 19 mi striker hi kum nga chhung atan contract an ziahpui a, mahse, season khat chu Salzburg lamah hian loan-in hun a hmang leh phawt ang.

Anni bakah hian Hoffenheim defender David Raum chu €26mtd-in an lalut a, VFL Wolfsburg midfielder Xaver Schlager an lalut a, Heracles Almelo goalkeeper Janis Blaswich chu free transfer-in an lalut bawk.

Leipzig hi Denmark forward Yussuf Poulsen, Spanish attacking midfielder Dani Olmo, Germany centre back Marcel Halstenberg, Sweden attacking midfielder Emil Forsberg, Hungary attacking midfielder Dominik Szoboszlai leh Portugal forward Andre Silva kawltu an ni.

France international Christopher Nkunku-a'n rimtu tam tak karah contract thar a ziak bawk a, Bundesliga player of the season ni lai a ni - Leipzig-in Bayern Munich elpui ber nih an tum.