Fury a lo kir leh dawn; Chisora a cho!

April thlaa inhnek a chawlhsan thu puangtu Tyson Fury chuan a vawi thum nana inhnek turin Derek Chisora a cho a, kum 33 mi boxer hian ring chhung rah leh ngei a duh niin a lang.

Fury hian April thla khan amah ang thoa British boxer Dillian Whyte chu round ruknaah a hneh a, inhnek zawh hian, "Gypsy King tan hei hi ennawm puanzar khar tawpna ber a ni thei ang," a ti.

Mahse, thla tam a liam hmain Fury a lo lang leh a, vawi hnih a lo hneh tawh Chisora chu ring chhunga luhpuiah a cho - boxer pahnih hi July, 2011 leh November 29, 2014 khan an lo inhnek tawh a, Fury a chak ve ve.

Pa takin
Fury chuan Chisora chu amah hlaua tlanchhiaah puhin, "Derek, a vawi thum nana inhnek duh loin i tlanchhia a ni. "Indona ka ni" tiin i inchhal a, arte pakhat ang lek chauh i ni thung," a ti!

Kum 38 mi Chisora hian Fury hi a cho hmasa zawk - July khan boxer ropui Kubrat Pulev chu points hmangin a hneh a, a zawna vawi thum zet a tlawm tawh chu titawpin WBA international heavyweight title a hlawh chhuak.

Del Boy War hminglem an pek Chisora hian hnehna a chan zawhah hian Deontay Wilder emaw Fury hmachhawn a duh thu a sawi a, Fury a ṭawng chhuak ve leh ta - inhnek tak ang maw?

Sawmna chu
Chisora promoter Eddie Hearn chuan Fury-a team-te aṭanga sawmna an hmuh ngei thu a sawi a, mahse, sum a tam tawk loh avangin Gypsy King hminglem an pek boxer sawmna chu an hnar thu a sawi.

Fury chuan, "Boxing-a ka lo kir leh chhan chu heavyweight world champion zinga trilogy (mi pakhat nena vawi thum inhnek) vawi hnih nei thei awmchhun ka nih dawn vang a ni.

"Ka career tawpah Chisora ka innuai pui leh ang tiin ka sawi fo ṭhin," a ti a, kum 38 mi boxer hi hmachhawn ngei a duh - Chisora a ngawi reng bik hauh lo ang.

Intuaitharna
Kum 33 mi Fury hian social media kaltlangin trainer thar a lak thu a puang bawk a, a ṭhian ṭha leh boxer ni bawk Isaac Lowe nen an thawhdun tur thu a sawi - Lowe hian training lamah tawnhriat a la nei lo.

Kum 28 mi hian boxing a la khel reng a, WBC international featherweight title kawltu hian vawi 26 fight a hmachhawnah vawi 21 hnehna a chang a, vawi hnih a tlawm a, vawi thum draw a nei - vawi ruk a khingpui a knockout.

Fury hian SugarHill Steward hnuaiah kum 2019 aṭang khan training a nei ṭhin a, SugarHill kaihhruaina hnuaiah hian Deontay Wilder chu vawi hnih a hneh a, April khan Dillian Whyte a hneh bawk - SugarHill hi Fury-a'n a lakluh hma hian trainer hriat hlawh a la ni lo.

Tu nge Chisora
Heavyweight boxing chawi nungtu ang hialin Fury hi sawi theih a ni - ring chhunga a rorumna leh thiamna piah lamah media a hmachhawn dan leh a ṭawngkam thiamna chu a larpui a ni a, a titi a ngaihnawm ṭhin hle.

Kum 38 mi Chisora erawh boxer ṭha tak ni mah se Fury-a boruak tem ang erawh a team phak lo - vawi 45 fight a hmachhawn tawhah vawi 33 a chak a, vawi 23 a khingpui a knockout a, vawi 12 a tlawm.

Chisora hian international title kawlte chu nei ve mah se, world title erawh a la kawl ngai lo a, February, 2012 khan boxer ropui Vitali Klitschko chu WBC heavyweight title fight pui mah se a hlawh chhuak zo lo - Fury a hmachhawn theih chuan WBC heavyweight title a fight leh thei dawn tihna a ni a, Chisora tan chuan hun ṭha a ni.

Chisora kher lo
Fury hian vawi 33 inhnek a hmachhawnah tlawm a la nei lo a, vawi 32 chakin, vawi 23 a khingpui a knockout a, vawi khat draw a nei - Chisora a hmachhawn thei ta lo a nih pawhin ring chhungah erawh a rawn kir ngei dawn niin a lang a, Chisora hian a chona hi pawm lo zel ta se, tu nge a hmachhawn ang tih chu zawhna awm thei tak a ni.

Tuna sawi langsar tak pakhat chu a vawi hnih nana Anthony Joshua leh Oleksandr Usyk te inhneka a chak zawk tum chu a ni - August 20 khian boxer pahnih hi an intawng dawn a, WBA (Super), IBF, WBO leh IBO heavyweight title an inchuh ang.

Fury promoter Frank Warren chuan a boxer chuan boxer inhnek pahniha chak zawk hi hmachhawn a châk a rin thu a lo sawi tawh a, a hmachhawn chuan heavyweight boxing-a kawnghren langsar pali an inchuh dawn tihna a ni ang. Gypsy King hmachhawn leh tur hi chiang thuai tura ngaih a ni.